Farg‘onada qurollangan jinoiy guruh ayol kishining uyiga bostirib kirdi

Quvasoy shahrining «Polmon» mahalla fuqarolar yig‘inida yashovchi Mavjuda Akbaraliyeva (ism-shariflar o‘zgartirilgan) 2021 yil 26 oktyabr kuni kenja o‘g‘li Nizom bilan birga qo‘shni mamlakatda yashovchi qarindoshlarinikiga to‘yga ketadi. Uyda qizi Muhayyo bir oylik chaqalog‘i bilan yolg‘iz qoladi.

O‘rni kelganda shuni aytish kerakki, bu oila o‘ziga to‘q oilalardan edi.

Qolaversa, katta o‘g‘li Ziyodulla Ak­baraliyev xorijda ishlab, yaxshigina daromad topishini ham mahalla ahli yaxshi bilardi.

Qo‘shni ko‘chada yashovchi Isroil Alimov orqavarotdan «Mavjuda Akbaraliyevaning uyida to‘rtta qopda xorij valyutasi bor», degan uzunquloq gapni eshitgan edi. Ammo bu gap qanchalik rost yoki yol­g‘on ekanini u aniq bilmasdi.

Keyinchalik vaziyat shunga borib yetdiki, u bu mablag‘ni qo‘lga kiritish uchun jinoiy reja tuzishga kirishdi. Oxir-oqibat u g‘arazli maqsadini sinfdoshi Ma’ruf Iminjonov va mahalladoshi Jafarali Mamanovga aytdi.

— Qulay paytni poylab, uy­ga kiramiz. Agar hammasini olib chiqsak, sizlarni qu­ruq qo‘ymayman, ikki ming dollardan beraman, — dedi I. Alimov.

Hamtovoqlari mo‘may daromad daragini eshitib, darhol uning taklifiga rozi bo‘lishdi.

— Yana bir kishi kerak, har holda ko‘p­chilik bo‘lsak, ish tez bitadi, — deya mas­lahat berdi I. Alimov. Sheriklari ham bu fikrni ma’qullashdi.

Ertasi kuni I. Alimov voya­ga yetmagan Ahror Saydullayevning ko‘ngliga qo‘l solib ko‘rdi. O‘sha paytda A. Saydullayevning ikki kishidan qar­zdor bo‘­lib, shuni qanday to‘lashni bilmay boshi qo­­tib yurgan edi. Shu bois u dollar «operasiya»sini eshitgach, o‘y­lab ham o‘tirmay rozi bo‘ldi.

Jinoiy rejaga ko‘ra, Isroil, Jafarali va Ahror xonadonga yashirincha kiradigan, Ma’ruf esa, ko‘­chada poylab turadigan bo‘ldi.

2021 yil 24 oktyabr kuni kechqurun jinoiy guruh M. Akbaraliyevaning uyi oldiga kelishadi. Ammo kutilmaganda mehmonlar kelib, hovli gavjum bo‘lib qoladi. Buni ko‘rib, jinoiy guruh rejani amalga oshirishni boshqa kunga qoldirishadi. Ammo keyingi safar Jafarali kelmaydi. Shuning uchun ichkariga Isroil bilan Ahror kiradi. Bu vaqtda Ma’ruf nariroqdagi kanal bo‘yida I. Alimovning otasi Ikrom Alimovga tegishli «Damas» avtomashinasida ko‘chani kuzatib turadi.

Yuziga niqob taqib, qo‘liga «Gletcher CLT 1911» rusumli to‘pponcha tutgan «chaqirilmagan mehmonlar» xonadonga kirib, pul qidirishga tushishadi.

Ay­ni shu paytda bolasi bilan uyda o‘tirgan Muhayyo Akbaraliyeva oyoq tovushlarini eshitib qo‘rqib ketadi, bir muddat gapira olmay qoladi.

So‘ng bolasini bag‘ri­ga bosib, biroz o‘ziga kelgach, notanish kimsalardan kim ekanini so‘raydi.

— Baqirsang, otib tashlayman, — dey­di I. Alimov un­ga to‘pponchani o‘qtalib.

Ayni shu mahal Muhayyoning uyali telefoni jiringlab qoladi.

Qo‘shnisining qi­­zi Malikaga kechasi o‘zi bilan birga yotishni iltimos qilgani uchun u telefon qilayotgan edi.

— Javob ber. Ammo ko‘p gapirma, ke­yinroq qo‘ng‘iroq qi­laman, de, — deb buyuradi Isroil.

— Malika, bolamni uxlatayotgandim. O‘zim sizga qo‘n­g‘iroq qilaman, — deydi Muhayyo past ovozda.

Aloqa uzilgach, I. Alimov undan telefonni tortib oladi. Keyin dag‘dag‘a qilishga o‘tadi:

— Pullar qayerda? To‘rt qop dollar bor, buni hamma biladi, topib ber!

— Bizda hech qanday pul yo‘q, — deya javob beradi M. Akbaraliyeva titragancha.

Isroil esa, uning gapini oxirigacha eshitmay, A. Saydullayevga yuzlanadi:

— Bor, xonalarni birma-bir qarab chiq!

Biroq oradan ko‘p o‘tmay Ahror hech vaqo topolmay qaytib chiqadi. I. Alimov to‘pponchani unga berib, o‘zi xonama-xona pul izlashga tushadi.

— Tillalar qayerda?, — deb u o‘shqiradi pullarni topolmagach.

Bunga javoban Muhayyo onasi tilla taqinchoqlarini to‘y­ga taqib ketganini, shuning uchun o‘zining taqinchoqlarini berishini aytadi. Shunda birdan chaqaloq yig‘lab qoladi.

— Iltimos, bolamga tegmang, — deya ayol yalinib jigarbandini bag‘riga bosadi.

Shundan so‘ng M. Akbaraliyeva qo‘rqqanidan onasining buyumlari turadigan seyfni ochib beradi. Bosqinchilar seyf­­dagi Mavjuda Akbaraliyevaga tegishli 24 700 000 so‘mlik 17 dona kumush va tilla taqinchoqlar, 4 AQSh dollari (42 780 so‘m), narxi 250 000 so‘m­lik «Armani» rusumli erkaklar qo‘l soati, ba­hosi 450 AQSh dollariga teng bo‘l­gan «iPhone» rusumli uyali alo­­qa telefoni, 1 020 000 so‘mlik «Samsung» rusumli uyali aloqa telefoni ham­da 300 000 so‘m naqd pulni qo‘l­ga kiriti­sha­di. So‘ngra Isroil Mu­hayyo­dan yerto‘­laga olib tushishini talab qiladi. Lekin yerto‘ladan pul topilmaydi.

— Yaxshilikcha pullar qayerdaligini ayt, bo‘lmasa, otaman, — deb o‘dag‘aylaydi u to‘pponchani o‘qlagandek bo‘lib.

To‘pponchaning o‘qlanayotgan ovozini eshitganda M. Akbaraliyeva yig‘lab yuboradi va uy­da boshqa pul yo‘qligini aytadi. Xuddi shu mahal darvozani kimdir taqillatib uy egasining ismini aytib chaqiradi. Bu profilaktika inspektori R. Rahmonaliyev edi. Uning ovozini tanigan I. Alimov Muhayyoga «Ichkariga kir, eshikni ochma» deb buyruq beradi. Kelinchak e’tiroz bildirmay, o‘z xonasiga kirib ketgach, Isroil bilan Ahror hovlining orqa tarafidan ko‘­chaga qochib ketishadi.

Muhayyo Akbaraliyeva dar­hol eshikni ochib, inspektorga jinoyatchilar qochgan tomonni ko‘rsatadi. R. Rahmonaliyev bos­qinchilarning iziga tushadi. Oqi­batda bosqinchilar o‘sha kuniyoq qo‘lga olinadi. Ularning hamtovog‘i Jafarali Mamanov ertasi ku­ni ushlanadi. Shundan so‘ng bosqinchilarga nisbatan jinoyat ishi qo‘zg‘atiladi.

Yaqinda jinoyat ishlari bo‘­yicha Quvasoy shahar sudi Is­roil Alimov, Ma’ruf Iminjonov, Jafarali Mamanov va Ahror Saydullayevni Jinoyat kodeksining bir qator moddalariga asosan aybdor deb topib, turli muddatga ozodlikdan mahrum qilish jazosini tayinladi.

Biroq J. Mamanov va A. Saydullayev sud hukmidan norozi bo‘lib, apellyasiya ins­tansiyasiga murojaat qilishdi. Apellyasiya ins­tansiyasi sudi majlisida ayon bo‘l­diki, birinchi bos­qich sudi ularning qilmishlarini to‘g‘­ri malakalagan. Qolaversa, ularning aybi jabrlanuvchi, guvohlarning dast­labki tergov va suddagi ko‘rsatmala­ri,­ hodisa joyini ko‘zdan kechirish, ashyoviy dalilni olish, ashyoviy dalillarni ko‘zdan kechirish, sudlanuvchilar o‘r­tasida o‘tkazilgan yuzlashtirish bayonnomalari, sud-ballis­tik ekspertizasi xulosasi, videotasvir va fotosuratlar hamda ishda to‘p­langan boshqa dalillar bilan to‘liq isbotlangan. Shuningdek, ta­yin­langan jazo jinoyatning xususiyati va ijtimoiy xavf­lilik darajasi, jazoni yengillashtiruvchi va og‘irlashtiruvchi ho­latlarga to‘liq mos keladi. Binobarin, Far­g‘ona viloyati sudi sudlov hay’ati apellyasiya shi­koya­tini qa­noatlantirmasdan, sud hukmini o‘zgarishsiz qoldirish yuzasidan ajrim chiqardi.

Xulosa o‘rnida shuni ta’kidlash joizki, hayotda oqibatini o‘ylamay bosilgan har bir qadam insonni ayanch­li qismatga girftor qiladi. Bunday paytda pushaymon bo‘­lishning aslo foydasi yo‘q. Ayniqsa, sudlanuvchilarning ota-onalari takror-takror afsus chekkandan ko‘ra avval-boshidanoq far­zand­lariga to‘g‘ri tarbiya bersa, ularning yurish-turishini jiddiy nazoratga olishganda bayon etilgan voqea sodir bo‘lmasdi.

To‘lqin TO‘RAQULOV,

Farg‘ona viloyati sudi sudyasi