Bog‘otlik erkak avval sotuvchini, keyin qarindoshini vahshiylarcha o‘ldirdi
Bog‘otlik Islombek Abdullayevning mash’um jinoiy qilmishi adolat tarozusida tortilgan chog‘ aybni yengillashtiruvchi holatlar ko‘zga tashlanmadi. Og‘irlashtiruvchi jihatlar esa, ancha-muncha tosh bosdi.
…Hammasi Islom o‘zi yashaydigan mahalladagi oziq-ovqat do‘koni egasi Faxriddin Quriyozovga 200 AQSh dollari miqdoridagi pulni galdagi xaridlar uchun oldindan to‘lov tariqasida bergandan so‘ng boshlandi.
…2020 yil 2 aprelda kun peshinga oqqan mahal Islom ushbu pul evaziga mol xarid uchun yana do‘konga keldi. Do‘kon egasi to‘langan pul shu paytgacha qilingan xaridlar uchun xarjlab bo‘lingani, atigi 17 ming 500 so‘mlik haqi qolganini bildirdi. Ammo qarshi tarafning ham o‘z hisob-kitobi bor edi.
Aytishicha, xaridning qiymati do‘konga topshirilgan pulga qaraganda ancha oz.
Do‘kon sohibi ham bo‘sh kelmadi.
Islomning dalil-isbotini tan olmadi. O‘z navbatida, xaridorning ta’biga o‘tirmaydigan dalillarni ilgari surdi. Do‘kondagi tortishuv uzoq cho‘zilmadi. Bir chog‘ Islom kelgan yo‘liga shitob bilan ketdi. U do‘kondan 30 qadamcha naridagi go‘sht do‘koniga kirib, qassobdan bir-ikki daqiqaga pichog‘ini berib turishini so‘radi. Qassob tanishligi bois uning gapini yerda qoldirmadi. Islom pichoqni cho‘ntagiga joylagancha oziq-ovqat do‘koniga yo‘naldi. Kira solib, do‘kon egasiga tashlandi.
Pichoq hash-pash deguncha Faxriddinning chap ko‘krak sohasi — qoq yuragiga ikki marta sanchildi. Bu voqea do‘kon egasining turmush o‘rtog‘i Gulruh Qurbonovaning ko‘z o‘ngida ro‘y berdi. Dahshatdan ayolning o‘takasi yorilayozdi. Biroq u tezda o‘zini qo‘lga olib, olishayotganlarni bir-biridan ajratishga urindi. Bo‘lmadi. Bu paytga kelib, pichoq bilan qilingan hamla bois ko‘kragidan og‘ir jarohat olgan Faxriddin jon holatda Islombekning qo‘liga yopishdi. Oxirgi kuchini to‘plab, raqibi qo‘lidagi pichoqni tortib olishga muvaffaq bo‘ldi.
Do‘kondagi olishuvdan atrofdagilar xabar topgan bo‘lsa-da, o‘rtaga tushishga hech kimning yuragi dov bermadi. «Tomosha»ga guvoh bo‘lganlar «Tez yordam» hamda ichki ishlar bo‘limiga xabar berishdi. Qilarini qilgan Islom esa, yana iziga qaytdi. Yo‘l-yo‘lakay yolg‘iz yashayotgan qarindoshi Oybek Quriyozovning uyiga kirdi. Unga bir necha daqiqa muqaddam o‘zi sodir etgan dahshatli voqea haqida uzuq-yuluq gapirib berdi. Aslida u qarindoshi huzuriga xayrixohlik istab borgandi. Ammo uning o‘yi chippakka chiqdi.
Oybek qarindoshining qilmishini eshitib, g‘azabi qo‘zidi. Uni qattiq jerkidi, sodir qilingan xunrezlikni vahshiylik, noinsoniylikka yo‘ydi.
Islom shu topda o‘zganing o‘git-nasihatiga muhtoj emas, aksincha, o‘z xatti-harakatining oqlanishini xohlardi. Qarindoshining tanbehi unga og‘ir botdi, o‘zini bu yerda ham haqoratlangan, kamsitilgandek his etdi. Sanoqli daqiqalar muqaddam do‘konda jahl otiga mingan bo‘lsa, qarindoshining dakkisidan so‘ng tamomila esidan og‘di, haqiqiy telbaga aylandi. Shuning uchun Oybekning yuziga qulochkashlab musht tushirdi. Lekin u buni kam bilib, atrofga alangladi, yonginasidagi temir bolg‘aga ko‘zi tushgach, uni tezda qo‘liga olib, qarindoshiga hezlandi. Bolg‘aning zarbi ojiz ahvoldagi Oybekning boshiga bir emas, bir necha marta yog‘ildi. Xonadon egasi izma-iz berilgan zarbalar zabtidan yerga gursillab quladi. Bir necha daqiqa o‘tgach esa, shu yerning o‘zida jon taslim qildi.
Bu orada Islomning pichoq zarbidan qattiq shikastlangan yana bir jabrdiyda — do‘kondor F. Quriyozov kasalxonada vafot etdi. Bir yo‘la ikki qotillik, hayoti bemavrid so‘ngan ikki nafar beayb, begunoh insonning ayanchli qismati…
Bunday mudhish qilmishni oqlash yoki xaspo‘shlashning imkoni yo‘q. Inson hayoti va sog‘ligiga qilingan tajovuzni hech narsa bilan oqlab bo‘lmaydi.
Islom sudda o‘zi sodir etgan qotilliklarni oqlash, izohlashga arzirli biron-bir jo‘yali dalil keltirolmadi. Turgan gapki, aybini ham xaspo‘shlay olmadi, iqrorlik bildirdi, pushaymonligini bayon etdi.
Sud muhokamasida ishtirok etgan jabrlanuvchilarning qonuniy vakillari G. Qurbonova, U. Quriyozov, guvoh O. Qurbonov, B. Masharipov, N. Sultonova, SH. Ozodov ham ro‘y bergan mash’um jinoiy qilmishning barcha tafsilotlarini ochiq-oydin bayon etishdi. Ayblanuvchining xatti-harakatini oqlaydigan dalillar bu jarayonda ham topilmadi. Uni qoralaydigan dalil va holatlar esa, uqtirilganidek, nihoyatda ko‘p va ularning bari ushbu jinoiy hodisaga oid ayblov xulosasida ham o‘z ifodasini topdi.
Tergov organi tumanning Mirishkor qishlog‘i «Ma’naviyat» mahallasida ro‘y bergan mudhish qotillikni Jinoyat kodeksining qasddan odam o‘ldirishga taalluqli 97-moddasi 2-qismi «v», «g», «j», «l», «o», «r» bandlari bo‘yicha malakaladi. Sud ushbu ayblarning barini tarozuga soldi. Taqdim etilgan fakt va dalillarni o‘rganish chog‘i ushbu kodeksning 97-moddasi 2-qismi «j», «r» bandlari ayblanuvchiga nisbatan to‘g‘ri tadbiq qilinganini e’tirof etdi. Biroq ushbu qismning «v», «g», «l», «o» bandlari yuzasidan qo‘yilgan ayblar haqiqiy holatni to‘la-to‘kis aks ettirmaydi. Chunonchi, aybdorga ayon bo‘lgan ojiz ahvoldagi odamni o‘ldirish, o‘z xizmat yoki fuqarolik burchini bajarishi munosabati bilan shaxsni yashashdan mahrum etish, bezorilik yo‘li bilan joniga suiqasd qilish, boshqa bir jinoyatni yashirish yoki uning sodir etilishini osonlashtirish niyatida hayotiga tajovuz qilish holatlari I. Abdullayev tomonidan amalga oshirilgan qotillik harakatida mavjud emas. Sud zikr etilgan ana shu bandlar bo‘yicha qo‘yilgan ayblarni tan olmadi.
Inson umri Yaratganning izmida. U o‘z bandalariga biror kimsani hayotdan judo etishga izn bermaydi. Basharti, bu ish Yaratganning xohishiga zid ravishda o‘zga birov tarafidan sodir qilinar ekan, u aslo kechirilmasdir.
Sud ashaddiy jinoyatchi Islom Abdullayevni qilmishiga yarasha uzoq muddat — 20 yilga ozodlikdan mahrum etish yuzasidan o‘z hukmini chiqardi. Lekin qo‘li bir yo‘la ikki begunoh kishining qoniga belangan kimsa uchun bu jazo yetarlimikin?! Mudhish jinoyatga qo‘l urgan kimsa borki, barini ushbu qismat: bir umrlik vijdon azobi, ilohiy jazo kutadi. Odamiylikdan mosuvo bunday kimsalarni Yaratganninggina emas, el-ulusning ham tavqi-la’nati ta’qib qiladi.
Abdulla Sobirov,
jurnalist