“Narxoz”da haftada 5 kunlik o‘qish joriy qilindi va o‘quv formasi olib tashlandi

Joriy yil 25 noyabrdan boshlab Toshkent davlat iqtisodiyot universitetida haftada 5 kunlik o‘qish joriy etiladi. Bu haqda "everyday.uz" yozmoqda.

Bu haqda universitet rektori professor-o‘qituvchilar tarkibi bilan bo‘lib o‘tgan yig‘ilishda ma’lum qilgan.

Shuningdek, TDIUda o‘quv formasi ham bekor qilinishi ta’kidlangan.

“Bundan buyon talabalar o‘quv binosida xohlagan kiyimlarida yurishlari mumkin. Hech kim ko‘ylak kiyishga va bo‘yinbog‘ taqishga majbur qilmaydi”, - deydi universitet rektorati xodimi.

Eslatib o‘tamiz, noyabr oyi boshida TDIUda rektor almashgan edi. Ishdan olingan Bahodir Xodiyev o‘rniga Oliy ta’lim vaziri o‘rinbosari Kongratbay Sharipov tayinlangan.