Koronavirus yozda yo‘qolib ketishi taxmin qilingandi. Nega unday bo‘lmadi? (VIDEO)
Yoz faslida koronavirus yo‘qolib ketishi taxmin qilingan edi, lekin unday bo‘lmadi. Innovasion sog‘liqni saqlash milliy palatasi tibbiy standart va protokollarni ishlab chiqarish bo‘limi boshlig‘i Klara Yodgorova «Tez yordam» loyihasida bu haqda o‘z fikrini bildirdi. Bu haqda "Kun" nashri xabar berdi.
Uning bildirishicha, ilk davrlardanoq koronavirus yoz faslida yo‘qolib ketishi haqidagi taxminlar hech qanday dalillarga asoslanmagan holda aytildi.
«Hozir esa ko‘rib turibmizki, bizda iqlim quruq va havo issiq bo‘lishiga qaramay koronavirus yo‘qolgani yo‘q. Yana ba’zi fikrlarda quyosh nuri yetishmayotgani tufayli karantinda o‘tirganlarga ayrim dorilar taklif qilinayotgani aytildi.
Jahon tajribasiga qaralsa, eng kam kasallangan hududlar Skandinaviya davlatlari: Islandiya, Norvegiya, Daniya va Finlyandiya bo‘lib qolmoqda. Faqatgina Shvesiya hamma narsani inkor qilib, kollektiv immunitet hosil qilinadi, deb noto‘g‘ri yo‘lga kirib ketdi. Buning oqibatida juda ham ko‘p inson hayotdan ko‘z yumdi va Shvesiya hukumatiga eng katta olimlar tomonidan shu eksperimentni to‘xtatish haqida xat yozildi. Shu g‘oyani ilgari surgan epidemiolog ham ko‘p xatoliklarga yo‘l qo‘yilganini tan oldi.
Bu yangi virus. Har bir davlat shu virusni qanday profilaktika qilish, qanday davolashni o‘z tajribasidan kelib chiqqan holda ko‘rib chiqishi kerak», - dedi Klara Yodgorova.
