Ukraina defoltdan qochishi uchun bir oy vaqt bor — The Economist

Ukraina kreditorlar bilan qarzni qayta tuzish bo‘yicha kelishib olish va defoltga yo‘l qo‘ymaslik uchun bir oy muddatga ega. Bu haqda The Economist nashri xabar berdi.

Ikki yil davomida Ukraina kreditorlari qarzni to‘lashni to‘xtatib turishga rozi bo‘lgan. Biroq xususiy xorijiy obligasiyalar bo‘yicha moratoriy 1 avgustda tugaydi.

Agar Ukraina defolt e’lon qilsa, bu investorlarning G‘arb majburiyatlariga bo‘lgan ishonchiga putur yetkazishi va mamlakatning urushdan keyingi tiklanishi uchun falokat keltirishi mumkin. Kreditorlar Ukraina taklif qilgan qarzni 60 foizga qisqartirishni rad etib, uning o‘rniga 22 foizga qisqartirishni talab qilgan. Xalqaro valyuta fondi (XVF) Ukraina bilan qarzni yengillatish bo‘yicha muzokaralar olib borish istagini bildirgan.

Agar qarz restrukturizasiyasi bo‘yicha kelishuvga erishilmasa, Ukrainaning ikkita yo‘li bor: qarzni to‘lash bo‘yicha moratoriyni uzaytirishga rozi bo‘lish yoki defolt e’lon qilish, — deyiladi xabarda.

Obligasiya egalari Ukraina g‘alaba qozonsa, uzoq muddatli tiklanish rejalariga ham shubha bilan qaramoqda. Ittifoqchilar va XVF Ukrainani qayta tiklash urush tugashi va ittifoqchilar qarzlarini kechganidan so‘ng moliyaviy bozorlarga qaytishiga imkon berishini ta’kidlasa-da, investorlar bunga ishonchsizlik bildirgan.

Ukraina joriy yilda eng muhim infratuzilmalarni tiklashni moliyalashtirish uchun yana 9,5 milliard dollar qidirmoqda. Bular mudofaa sanoati, energetika, shikastlangan uy-joylarni tiklash, qishloq xo‘jaligi, tabiiy resurslar, raqamli texnologiyalar va IT sektoridir.