Ziyoratchilarimiz Makkada tantanali kutib olinmoqda
Saudiya Arabistonidagi muqaddas shahar – Makkai mukarramaga haj amallarini ado etish uchun navbati bilan yetib kelayotgan yurtdoshlarimiz muhtasham “Abroj al-Hidoya” mehmonxonasida tantanali ravishda katta ehtirom bilan kutib olinmoqda.
Yorug‘ orzular, ezgu tilaklar, katta ixloslar og‘ushida kelayotgan mehmonlarga O‘zbekiston musulmonlari idorasi raisi, muftiy Usmonxon Alimov hazratlari, Din ishlari bo‘yicha qo‘mita raisi o‘rinbosari Nuriymon Abulhasan va Saudiya Arabistonidagi hamkor “al-Hidoya” shirkati rahbarlari peshvoz chiqmoqdalar.Ziyoratchilarimiz mehmonxonaga yaqinlashganda salavotlar aytilayotir hamda ularga shirinliklar ulashilib, muqaddas zam-zam suvi bilan ikrom qilinmoqda.
Hashamatli mehmonxonadan joylari tayin bo‘lgan ziyoratchilarimiz bu yerda mamlakatimizdan ularga xizmat ko‘rsatish uchun birmuncha oldinroq yetib kelib, katta hozirliklar ko‘rib qo‘ygan ishchi guruh tarkibidagi mohir oshpazlarimizning oshpazlikni san’at darajasiga ko‘targaniga guvoh bo‘layotir, nainki guvoh bo‘layotir, balki ular pishirgan lazzatli taomlardan taomlanib, og‘izda mazasi qoladigan shirinliklardan ham bahra olayotir.Ma’lumingizki, Alloh taolo aziz-u barakali qilib qo‘ygan Makkai mukarramada dunyoning barcha makonlarida bitadigan meva-sabzavotlarning hammasidan bor va o‘sha ne’matlarning barchasi bizning hojilarimizga xizmat ko‘rsatayotgan mehmonxona oshxonasiga ham keltirilib ziyoratchilarimiz uchun yozilgan dasturxonga tortilgan. Yanada e’tiborlisi, ziyoratchilar ulardan ta’biga qarab istaganicha iste’mol qilaveradi...
Bunday ajoyib sharoitlar ziyoratchilarimizning ibodatga bo‘lgan rag‘batini yanada oshirishga, Buyuk Parvardigorimizning hisobsiz ne’matlarining shukronasini keltirishga bo‘lgan ishtiyoqlarini yanada ziyoda qilmoqda.
Manba: muslim.uz
