Tolibon AQSh pozisiyasini olqishladi
Qatar poytaxti Doha shahrida BMT shafeligida Afg‘oniston bo‘yicha bo‘lib o‘tayotgan uchrashuvlar doirasida Tolibon Afg‘onistonning bank va iqtisodiy faoliyatiga qo‘yilgan cheklovlarni bekor qilish haqidagi AQSh (va bir qator boshqa mamlakatlar) «va’dasini» olqishladi.
“Bugungi uchrashuv juda yaxshi o‘tmoqda. Aksariyat davlatlar Afg‘onistonning xususiy sektorini qo‘llab-quvvatlashini bildirgan. Bank va iqtisodiy faoliyatga qo‘yilgan cheklovlarni olib tashlashga va’da berildi”, - dedi Afg‘oniston hukumati voizi Zabihulloh Mujohid.
“Rossiya, Xitoy, Eron, Pokiston, Qozog‘iston, O‘zbekiston, Qirg‘iziston, Turkmaniston, AQSh va Islom hamkorlik tashkilotining pozisiyasi olqishga loyiq”, - deya qo‘shimcha qildi Mujohid.
Bu BMTning uchinchi shunday yig‘ilishi, Tolibonning esa o‘zi ishtirok etayotgan bir qator uchrashuvlarning birinchisidir.
Ma’lumot uchun, xalqaro hamjamiyat 2021 yil avgustidan buyon «Tolibon» harakatiga yetakchilik qilib kelayotgan Afg‘onistonning amaldagi hukumatini hali rasman tan olgani yo‘q.
