“SpaceX” dekabr oyida maxfiy sun’iy yo‘ldosh uchirishni rejalashtirmoqda
Amerikaning “SpaceX” kompaniyasi dekabr oyida o‘z tashuvchi vositalaridan foydalangan holda to‘rtta kosmik kemani orbitaga olib chiqmoqchi.
Bu haqda “Spaceflight Now” xabar bermoqda.
Ta’kidlanishicha, 5 dekabr kuni NASA bilan tuzilgan shartnoma asosida “Falcon 9” tashuvchisi “Cargo Dragon” kosmik kemasi bilan Xalqaro kosmik stansiyasiga ekipaj uchun 2,5 tonna oziq-ovqat, uskunalar va ilmiy tajribalar uchun materiallar bilan yuboriladi.
Shundan so‘ng, “SpaceX” Amerikaning “SXM-7” telekommunikasion sun’iy yo‘ldoshi va Turkiyaning “Turksat 5A” aloqa sun’iy yo‘ldoshini kosmosga uchirmoqchi.
Dekabr oyining ikkinchi yarmida esa Amerikaning maxfiy “NROL-108” sun’iy yo‘ldoshini AQSh Milliy Aerokosmik razvedka boshqarmasi manfaati uchun orbitaga chiqarish rejalashtirilgan.