AQSh va G7 Rossiya aktivlarini Ukrainaga o‘tkazish imkoniyatlarini o‘rganmoqda - Davlat departamenti

Qo‘shma Shtatlar Rossiyaning muzlatilgan aktivlaridan foydalanish imkoniyatlarini o‘rganish uchun G7 hamkorlari, shu jumladan Yaponiya bilan ishlashda davom etmoqda. Bu haqda Davlat departamenti matbuot xizmati rahbari o‘rinbosari Vedant Patel brifingda ma’lum qildi.

«Biz koalisiyamiz tarkibiga kiruvchi turli mamlakatlarda mavjud bo‘lgan turli huquqiy va sud tizimlarida qanday variantlar va yo‘llar mumkinligini o‘rganmoqdamiz», dedi Davlat departamenti vakili.

Patel Rossiya tashqi ishlar vaziri o‘rinbosari Sergey Ryabkovning Rossiyaning muzlatilgan aktivlarini musodara qilish bo‘yicha amaliy choralar ko‘rilsa, AQSh bilan diplomatik munosabatlar maqomi pasayishi mumkinligi haqidagi ogohlantirishlariga izoh bermadi, deya aniqlik kiritadi «TASS».