Oq uy o‘z diplomatlariga Putinning inaugurasiya marosimida qatnashmaslikni buyurdi

Amerika ma’muriyati AQShning Moskvadagi elchixonasi vakillariga Rossiya prezidenti Vladimir Putinning inaugurasiyasi marosimida qatnashmaslikni buyurdi.

Bu haqda Oq uy matbuot kotibi Karin Jan-Pyer jurnalistlar uchun navbatdagi brifingda ma’lum qildi.

Uning so‘zlariga ko‘ra, AQSh rahbariyati “o‘z elchixonasiga inaugurasiya marosimida qatnashmaslik haqida ko‘rsatma bergan”. Jan-Pyerga ko‘ra, AQSh shu tariqa Ukrainadagi urushga norozilik bildirgan.

"O‘ylaymanki, biz o‘zimizni aniq ifodaladik, qo‘shadigan hech narsam yo‘q", - deya xulosa qildi Oq uy matbuot kotibi.

Eslatib o‘tamiz, 7 may kuni Moskvada Rossiya yetakchisi Vladimir Putinning inaugurasiyasi bo‘lib o‘tdi. U beshinchi marta Rossiya prezidenti lavozimini egalladi.