Andijonda 100 ming so‘mlik kupyurani qalbakilashtirgan shaxslar ushlandi
Andijonda qalbaki pul tayyorlash va uni muomalaga kiritish bilan shug‘ullangan shaxslar qo‘lga olindi. Bu haqda viloyat IIB axborot xizmati xabar berdi.
Ma’lumotlarga ko‘ra, 9 oktyabr kuni soat 21:30 larda viloyat IIB JQB Korrupsiya va iqtisodiy jinoyatlarga qarshi kurashish bo‘limi hamda tuman IIB JQB xodimlari bilan hamkorlikda tezkor tadbir o‘tkazilgan. Tezkor tadbir davomida Andijon tumanida yashovchi fuqarolar A.X. va X.B. o‘zaro jinoiy til biriktirib, Epson-P50 rusumli rangli printer yordamida 100 ming so‘m kupyuradagi jami 6,9 million so‘m qiymatdagi qalbaki pullarni tayyorlab, kelgusida muomalaga kiritmoqchi bo‘lgan vaqtlarida qo‘lga olingan.
Olib borilgan dastlabki tergov harakatlari davomida A.X. 7 oktyabr kuni Jalaquduq tumanida yashovchi fuqarolar T.M., M.G. va U.I.ning tuman hududida joylashgan savdo do‘konlariga kirib, qalbaki usulda tayyorlangan 100 ming so‘mlik kupyuradagi pullarni o‘tkazgani aniqlangan.
Jinoyat ishi bo‘yicha 12 oktyabr kuni X.B. va A.X.ga nisbatan Jinoyat kodeksining 176-moddasi 2-qismi «v» (qalbaki pul, aksiz markasi yoki qimmatli qog‘ozlar yasash, ularni o‘tkazish) hamda 168-moddasi 3-qismi «b» bandlari bilan ayb e’lon qilinib, ularga nisbatan qamoqqa olish tarzidagi ehtiyot chorasi qo‘llanilgan. Hozirda mazkur holat yuzasidan tergov harakatlari davom ettirilmoqda.
