Namanganda tarixiy yodgorliklar o‘rnida uy-joy qurmoqchi bo‘lgan fuqaroga jinoyat ishi qo‘zg‘atildi

Yangi Namanganning “Go‘zal” mahallasida joylashgan “Bo‘zchi mozor” arxeologiya yodgorligidagi XVI-XVII asrlarga oid qabrlar fuqaro A.Q. tomonidan uy-joy qurish uchun buzib yuborilgan.

Prokuratura organlari tomonidan Madaniy meros agentligi bilan birgalikda tarixiy yodgorliklarni muhofaza qilish va saqlashga qaratilgan tizimli nazorat tadbirlari o‘tkazib kelinmoqda.

Shunday tadbirlarning birida Yangi Namangan “Go‘zal” mahallasida joylashgan “Bo‘zchi mozor” arxeologiya yodgorligining 0,17 ga yer maydonida fuqaro A.Q. tomonidan uy-joy qurish maqsadida XVI-XVII asrlarga oid qabrlar buzib yuborilib, qadimiy ob’ektga juda ko‘p miqdorda 6,9 mlrd so‘m zarar yetkazilgani aniqlandi.

Tekshirishlar natijasiga ko‘ra jinoyat ishlari qo‘zg‘atilib, tergov harakatlari olib borilmoqda.

Mazkur jinoiy qilmishlar qonunchilikka asosan og‘ir jinoyat hisoblanib, aybdor shaxslarga nisbatan 7 yilgacha ozodlikdan mahrum qilish jazosi qo‘llaniladi.