Blogerlar Sanjar Ikromov va Sherali Komilov qidiruvga berildi
Ichki ishlar vazirligi blogerlar Sanjar Ikromov (Sanjar Xo’ja) va Sherali Komilovni (Detektiv Uz) qidiruvga berdi. Ularga sirtdan firibgarlik ayblovi qo‘yilgan, Komilov esa haqorat qilishda ham ayblanmoqda.
Sanjar Ikromov va Sherali Komilov
O‘zbekiston Ichki ishlar vazirligi ikki blogerni qidiruvga berdi. Ularning ismi-sharifi IIV saytining qidiruvga berilgan shaxslar bo‘limida e’lon qilingan.
Birinchichi, Sanjar Xo’ja taxallusi bilan tanilgan Sanjar Ikromov (1988 yilda tug‘ilgan, YouTube`da 200 mingdan ortiq, Telegram`da 18,3 ming, Facebook`da 29 ming obunachisi bor). U siyosat, iqtisod va psixologiya mavzularida yozadi va gapiradi. Hozirda Turkiyada yashaydi.
Unga nisbatan Jinoyat kodeksining 168-moddasi 3-qismi «a» bandi bo‘yicha ayblov e’lon qilingan. Bu juda ko‘p miqdordagi firibgarlik jinoyatini nazarda tutadi va BHM 400 baravaridan 600 baravarigacha miqdorda jarima yoki 8 yildan 10 yilgacha ozodlikdan mahrum qilish bilan jazolanishi mumkin.
Ikkinchisi, Sherali Komilov (1979 yilda tug‘ilgan, «Detektiv Uz» YouTube-kanali muallifi (17,8 ming obunachi, Facebook`da — 8140). U asosan ijtimoiy mavzularni ko‘tarib chiqadi. Uning ko‘plab postlarida diniy bloger Abror Abduazimov (Abror Muxtor Aliy) tanqid qilinadi.
Unga nisbatan Jinoyat kodeksining 168-modda 3-qismi «b» bandi bilan ayblov e’lon qilingan. Bu o‘ta xavfli residivist tomonidan sodir etilgan firibgarlik jinoyatini nazarda tutadi va BHM 400 baravaridan 600 baravarigacha miqdorda jarima yoki 8 yildan 10 yilgacha ozodlikdan mahrum qilish bilan jazolanishi mumkin.
Shuningdek, unga 140-modda 3-qismining «a» bandi bilan ayblov e’lon qilingan. Bu jabrlanuvchini o‘z xizmat yoki fuqarolik burchini bajarishi munosabati bilan bog‘liq holda haqorat qilish jinoyatini nazarda tutadi va BHM 400 baravaridan 600 baravarigacha miqdorda jarima yoki 2 yildan 3 yilgacha axloq tuzatish ishlari yoxud 1 yilgacha ozodlikni cheklash bilan jazolanishi mumkin.
