Volkswagen va Volvo kompaniyalari O‘zbekiston fuqarolarini ishga taklif qildi

Slovakiyaning Volkswagen va Volvo kompaniyalari haydovchilik, avtomobil ishlab chiqarish, kabel agregatlarini yig‘ish, montaj, avtomobillarni sinovdan o‘tkazish kabi yo‘nalishlarda O‘zbekistondan ishchilarni taklif etmoqda. Ish haqi 1200−1700 yevrodan boshlanadi.

Slovakiyaning Volkswagen va Volvo avtomobil ishlab chiqaruvchilari O‘zbekiston fuqarolarini ishga taklif qilmoqda, deb xabar berdi Kambag‘allikni qisqartirish va bandlik vazirligi.

Volkswagen kompaniyasi premium avtomobillarni ishlab chiqarish, kabel agregatlari, shassi va interyerni yig‘ish, montaj ishlari, diagnostika va avtomobillarni sinovdan o‘tkazish yo‘nalishida ishga taklif qiladi. Kompaniya 18 yoshdan 45 yoshgacha bo‘lgan 240 nafar mutaxassisni ishga oladi.

Ish uch smenadan iborat. Nomzodlardan rus tilini kommunikativ darajada bilish talab etiladi. Ish haqi oyiga 1200−1600 yevro orasida.

Volvo esa 18−45 yoshdagi 150 nafargacha yuk mashinasi haydovchilarini ishga oladi. Rus tilini bilishdan tashqari, C va E toifali haydovchilik guvohnomasi talab qilinadi, maosh oyiga 1700−2400 yevro.

Bandlik vazirligi va Tashqi mehnat migrasiyasi agentligi tez orada ro‘yxatdan o‘tish bo‘yicha e’lon beradi.