Putin "Qorabog‘da halok bo‘lganlar soni 4 mingdan oshdi, qochqinlar 8 mingdan ko‘proq"
Rossiya prezidenti Vladimir Putin Tog‘li Qorabog‘dagi gumanitar masalalarni hal qilish bo‘yicha o‘tkazilgan yig‘ilishda Armaniston va Ozarboyjon o‘rtasida kechgan janglarda qancha tinch aholi halok bo‘lganini aytdi.
“Janglar oqibatida tinch aholi orasida qurbonlar soni 4 mingdan oshdi, 8 mingdan ko‘proq kishi yaralandi, qochqinlar soni turli ma’lumotlarga ko‘ra o‘n minglabni tashkil qilmoqda, fuqarolik infratuzilmasi, ko‘plab madaniy ob’ektlar vayron bo‘lgan”, deb ta’kidlab o‘tgan Putin.
Rossiya yetakchisining ta’kidlashicha, ixtilofda jabr ko‘rganlarga insonparvarlik yordami ko‘rsatish va osuda hayotga qaytishda yordam berish lozim.
Putin shu maqsadda Rossiya tashqi ishlar vazirligiga Tog‘li Qorabog‘ning gumanitar muammolarini hal qilishda YEXHTning Minsk guruhi, Xalqaro Qizil xoch jamiyati, BMTning qochqinlar masalalari bo‘yicha oliy komissari boshqarmasi hamda YUNESKO bilan aloqani yo‘lga qo‘yish vazifasini topshirgan.
Putin ixtilofni Ozarboyjon, Armaniston va Rossiya yetakchilarining uch tomonlama bayonoti evaziga to‘xtatishga muvaffaq bo‘linganini qayd qilib o‘tgan. U, shuningdek, “Tog‘li Qorabog‘ ixtilofi” iborasini boshqa qo‘llashga hojat qolmasligiga umid bildirgan.
