Sharqiy Yevropa Rossiya bilan urushga tayyormi?

Sharqiy Yevropa davlatlari o‘z qurolli kuchlarini to‘ldirishda qiynalmoqda, bu esa ularni Rossiya bilan ehtimoliy harbiy mojaroga tayyorlanishlariga to‘sqinlik qilmoqda. Rossiya Federasiyasiga qarshi kurashish uchun NATO davlatlari 35 dan 50 tagacha qo‘shimcha brigadalar yaratmoqchi, deya xabar beradi Reuters.

Nashrning yozishicha, Vengriya, Polsha, Ruminiya, Slovakiya va Chexiya harbiy xizmatchilarni yollashda muammolarga duch kelmoqda. Xususan, Praga bir necha yillardan beri armiyaga yollash bo‘yicha maqsadlariga erisha olmayapti va qo‘shinlar darajasini saqlab qolishda qiynalmoqda.

Agentlikning qayd etishicha, chexlar 2021 yilda harbiy xizmatchilarni yollash rejasini atigi 56 foizga, 2022 yilda esa 85 foizga bajargan.

«Biz odamlarsiz hech narsa qila olmaymiz: agar biz jihozlarni yangilasak, lekin yetarli darajada malakali va g‘ayratli odamlarga ega bo‘lmasak, bularning barchasi pulni behuda sarflashdir», - deya Reuters Chexiya qurolli kuchlari Bosh shtabi boshlig‘i Karel Rehkning so‘zlarini keltiradi.

Agentlik ma’lumotlariga ko‘ra, Ruminiya hukumati Mudofaa vazirligining so‘nggi ma’lumotlariga ko‘ra, ofiserlar yetishmasligi 43%, oddiy askarlar esa 23% ni tashkil etganidan so‘ng, harbiy xizmatga faol yollanishni boshlagan.

8 iyul kuni Reuters agentligi o‘z ismini oshkor etmagan NATO harbiy zobitiga tayanib, alyans Ukrainadagi mojaro tajribasini hisobga olgan holda yangilangan harbiy rejalarni ishlab chiqayotgani haqida xabar berdi. Ular Rossiyaning taxminiy hujumini qaytarish uchun blokga 35-50 qo‘shimcha brigada kerak bo‘lishini taxmin qilmoqdalar. Agentlik ma’lumotlariga ko‘ra, NATO har birida uch mingdan 7 minggacha askardan iborat bunday sonli brigadalarni shakllantirishda qiyinchiliklarga duch kelishi mumkin.