Qoraqalpog‘istonda Orolbo‘yiga bag‘ishlangan xalqaro anjuman boshlandi
Qoraqalpog‘istonda Orol turizm haftaligi boshlandi. Haftalik doirasida 17-aprel kuni Nukus shahrida “Orolbo‘yining yaxshi niyat elchilari” xalqaro ilmiy-amaliy konferensiyasi o‘z ishini boshladi.
Tadbirda Ekologiya, atrof-muhitni muhofaza qilish va iqlim o‘zgarishi vazirligi, Qoraqalpog‘iston Respublikasi Jo‘qorg‘i Kengesi qo‘mitasi, Markaziy Osiyo atrof-muhit va iqlim o‘zgarishini o‘rganish universiteti ("Green University"), Orolbo‘yi xalqaro innovasion markazi, Germaniya xalqaro hamkorlik jamiyati (GIZ), BMTTD, Gidrometeorologiya ilmiy-tadqiqot instituti, O‘rmon xo‘jaligi ilmiy-tadqiqot instituti, O‘zbekiston Respublikasi Fanlar akademiyasi Botanika instituti, Atrof-muhit va tabiatni muhofaza qilish texnologiyalari ilmiy-tadqiqot instituti, mamlakatimiz oliy ta’lim muassasalari, xalqaro tashkilotlar va ommaviy axborot vositalari vakillari ishtirok etdi.
“Bugungi kunda atrof-muhitning ifloslanishi, iqlim o‘zgarishi va tabiiy resurslardan samarasiz foydalanish bilan bog‘liq global muammolar barqaror rivojlanishga e’tibor qaratish, ekologiya va atrof-muhitni muhofaza qilish sohasida yangi formatdagi mutaxassislar va ekspertlarni tayyorlash, shuningdek, muammolarni hal qilishda innovasion yondashuvlarni joriy etishni talab etmoqda, - dedi Ekologiya vaziri Jusipbek Kazbekov. - “Orolbo‘yi ezgu niyat elchilari” xalqaro ilmiy-amaliy konferensiyasi esa aynan Orolbo‘yi mintaqasidagi ekologiya, atrof-muhitni muhofaza qilish, tabiatni boshqarish va barqaror rivojlanish sohasida milliy, mintaqaviy va xalqaro innovasion tizimlarni qo‘llab-quvvatlash uchun yangi bilimlarni tatbiq etish va fanlararo tadqiqotlarni amalga oshirishga xizmat qiladi”.
Konferensiya davomida ishtirokchilar Orolbo‘yida amalga oshirilayotgan ishlar, Orol dengizi tubini o‘rmonlashtirishning o‘rni va ahamiyati, Amudaryoning quyi oqimidagi suv muammolari va ularni hal etish yo‘llari, Orolbo‘yining muhofaza etiladigan hududlarida barqaror turizmni rivojlantirish istiqbollari va boshqa ma’ruzalardagi ma’ruzalar bilan tanishdilar.
“Prezidentimiz Shavkat Mirziyoyev joriy yilda Orol dengizining qurigan tubida 100 ming gektar o‘rmon plantasiyalari yaratish vazifasini qo‘ydi. Biz allaqachon 156 ming gektar o‘rmon plantasiyalarini barpo etdik. Ularning bir qismi aviasiya yordamida chigit ekish orqali yaratildi. Joriy yilning bahor faslida ham ko‘chatlar ekyapmiz. Shu maqsadda ko‘chatlar va o‘simliklarni yetishtirish bo‘yicha Xalqaro markaz tashkil etishni ham rejalashtirganmiz, – dedi O‘rmon xo‘jaligi ilmiy-tadqiqot instituti laboratoriya mudiri, qishloq xo‘jaligi fanlari doktori Zinoviy Novitskiy. – Bundan tashqari, Qoraqalpog‘istonda yangi yo‘nalish – asalarichilikni rivojlantiryapmiz. Ayni paytga qadar 2 ming gektardan ortiq tomorqa plantasiyalarini yaratdik. Shuni ta’kidlash kerakki, bir gektar gullaydigan tamariks o‘simligidan 50 kg asal olish mumkin. Shu bois joriy yildan boshlab Orol dengizi tubida asalarichilikni rivojlantiramiz”.
Ma’lumot uchun, 2018–2023-yillarda Orol dengizi tubida 1 million 730 ming gektar hududda o‘rmon plantasiyalari tashkil etilib, 17 ming kvadrat kilometr maydon ko‘kalamzorlashtirildi. 2024-yilda esa jami 150-200 ming gektar maydonda o‘rmonlar barpo etish rejalashtirilgan.
