Rossiyada muhojirlar uchun rus tilidan imtihon topshirish qoidalari kuchaytirilmoqda
Migrantlarni imtihondan o‘tkazuvchi 12 ta universitetning barchasi tijorat hamkorlari bilan shartnomalarini bekor qilgan.
Rossiyadagi migrantlar endi tijorat tashkilotlarida rus tilidan imtihon topshira olmaydi. Rossiya Federasiyasi Ta’lim va fan vazirligi test sinovlarini o‘tkazish huquqiga ega bo‘lgan 12 ta oliy o‘quv yurti o‘z hamkorlari bilan tuzilgan barcha shartnomalarni bekor qilganini ma’lum qildi, deb yozadi «Gazeta.ru».
«Shunday qilib, ta’lim tashkilotlari nomidan imtihonlarni tijorat platformalarida o‘tkazish to‘xtatildi. Endi xorij fuqarolari uchun imtihonlarni faqat universitetlar va boshqa davlat va shahar tashkilotlari o‘tkazadi. Buning uchun platformalar barcha hududlarda paydo bo‘ladi. Vakolatli oliy o‘quv yurtlari tegishli kelishuvlarni yakunlamoqda», — deyiladi Ta’lim va fan vazirligi xabarida.
Rossiya Federasiyasida Ta’lim va fan vazirligiga bo‘ysunadigan to‘qqizta universitet, ikkita davlat universiteti, ta’lim vazirligining bitta universiteti va Moskva hukumatining bir tashkiloti rus tilidan chet tili sifatida imtihon topshirish huquqiga ega.
Rossiyadagi migrantlar uchun imtihonlarga o‘zgartirishlar kiritilishi mumkin
Rossiya Federasiyasi fan va oliy ta’lim vaziri Valeriy Falkov 18 aprel kuni bo‘lib o‘tgan yig‘ilishda universitetlar tomonidan hamkor tashkilotlar asosida imtihon o‘tkazilishini yanada ehtiyotkorlik bilan nazorat qilish zarurligini aytdi.
Falkovning buyrug‘iga qadar chet elliklar Rossiyaning 12 ta universitetlarida va bitta Moskva davlat tashkilotida, shuningdek, akkreditasiyadan o‘tgan universitetlar bilan shartnoma tuzgan tijorat firmalarida rus tilidan imtihon topshirishlari mumkin edi.
RBK xabariga ko‘ra, bunday tashkilotlar orasida xususiy hujjatlarni tarjima qilish agentliklari va migrantlarga huquqiy yordam markazlari ham bor. Ularning aniq soni noma’lum.
