Koronavirus! Toshkentda 10 nafar bemorning ahvoli og‘ir
Toshkent shahridagi ikki kasalxonada koronavirusdan davolanayotgan bemorlarning jami 10 nafari og‘ir ahvolda. Bu haqda Sanitariya-epidemiologiya nazorati davlat inspeksiyasi boshlig‘i Nurmat Otabekov «O‘zbekiston 24» telekanalidagi chiqishida ma’lum qildi.
O‘zbekistonning davlat bosh sanitariya inspektori Nurmat Otabekovning ma’lum qilishicha, 8 aprel soat 10:00 holatiga ko‘ra Toshkentdagi Virusologiya ilmiy-tekshirish instituti klinikasida 98 kishi davolanmoqda, ularning 25 nafarida pnevmoniya belgilari kuzatilmoqda, yetti nafar bemorning ahvoli og‘ir.
Shuningdek, Epidemiologiya, mikrobiologiya va yuqumli kasalliklar ilmiy-tekshirish instituti klinikasiga 69 nafar bemor joylashtirilgan bo‘lib, ulardan uch nafarining ahvoli og‘ir. Qayd etilishicha, O‘zbekistonning boshqa hududlarida ham koronavirusga chalingan bemorlar davolanmoqda.
Avvalroq 6 aprel kuni O‘zbekiston sog‘liqni saqlash vaziri Alisher Shodmonov ahvoli o‘ta og‘ir bo‘lgan ikki bemor sun’iy nafas olish apparatiga ulab qo‘yilganini ma’lum qilgan edi.