Hizbulloh Yaqin Sharqdagi tahdidlar ro‘yxatidan olib tashlandi

Arab davlatlari ligasi endi Hizbullohni terrorchi tashkilot deb hisoblamaydi. Bu haqda Arab Ligasi bosh kotibi yordamchisi Husam Zaki Bayrutda parlamentdagi «Qarshilik ko‘rsatishga sodiqlik» fraksiyasi rahbari Muhammad Raad bilan uchrashuvda ma’lum qildi, deb yozadi «Al-Akhbar.» gazetasi.

«Liga Hizbullohning terrorchi guruh maqomini olib tashlashga qaror qildi, chunki bu partiya Livanning hozirgi siyosati va kelajagida muhim rol o‘ynaydi», deb ta’kidladi misrlik diplomat.

Zakiyning Raad bilan uchrashuvi Saudiya Arabistoni tashabbusi bilan Hizbulloh Arab Ligasi tomonidan terrorchi tashkilot sifatida tasniflangan 2016 yildan beri birinchi uchrashuv bo‘ldi. O‘shanda Hizbulloh Eronning Yaqin Sharqdagi ta’siri uchun vosita bo‘lib, Iroq, Yaman, Livan, Suriya va Fors ko‘rfazidagi arab davlatlarining ichki ishlariga aralashganlikda ayblangan.

Diplomatning so‘zlariga ko‘ra, xalqaro hamjamiyat «Livan janubidagi qarama-qarshilikni to‘xtatuvchi G‘azo sektoridagi shiddatli urushni to‘xtatishga erishishi kerak».