Habib Nurmagomedov faoliyatidagi so‘nggi jangini kimga qarshi o‘tkazadi?
Habib Nurmagomedov o‘z karyerasida so‘nggi jangni kanadalik yakkakurashchi Jorj Sen-Pyerga qarshi o‘tkazishi mumkin. Bu haqida UFC rahbari Deyna Uayt o‘z tvitterida xabar qildi.
“Konor revansh o‘tkazishni istaydi. U buni Nurmagomedov bilan bo‘lib o‘tgan so‘nggi jangidan beri istaydi. Bilmadim, buni tashkil qilishning iloji bo‘ladimi, yo‘qmi. Agar Nurmagomedov so‘nggi jangini Sen-Pyerga qarshi o‘tkazishni e’lon qilsa, albatta, bu jangni tashkil qilish mumkin. Habib sport va janglarda o‘zini juda yaxshi ko‘rsatdi. Habib menga juda yoqadi, shuning uchun men uni u nimaki istasa, tashkil qilishga roziman”, – deydi Uayt.
Shu yilning oktyabrida BAAda bo‘lib o‘tadigan jangda Habibning raqibi amerikalik Jastin Getji bo‘lishi kutilmoqda.
Biroz oldin Habib Sen-Pyerga qarshi kurash o‘tkazishi mumkinligini xabar qilgandi, lekin kanadalik sportchi 2019 yilda karyerasi tugaganini ma’lum qildi. 39 yoshli Sen-Pyer faqat Nurmagomedovga qarshi kurash uchun rinngga qaytishi mumkinligini aytgandi.
Eslatib o‘tamiz, Habib Nurmagomedovning otasi Abdulmannop Nurmagomedov 3 iyul kuni koronavirus oqibatidan vafot etgan. Shundan so‘ng Habib otasi Dog‘istonda olib borgan bir necha sport inshootlarini qurib bitkazish uchun o‘zining sport karyerasini tugatishi mumkinligi haqida xabarlar paydo bo‘lgan edi.