Erdog‘an: "Butun dunyo Isroilni qo‘llasa ham, biz Falastinni himoya qilamiz"
Turkiya Tog‘li Qorabog‘da Ozarbayjonni qanday qo‘llab-quvvatlasa, Quddusdagi falastinliklarni ham xuddi shunday qat’iyat bilan qo‘llab-quvvatlay boshlaydi, dedi Turkiya prezidenti Toyyib Erdog‘an juma kuni.
"Biz terrorchi Isroil davlatining qilig‘idan g‘azablandik. Isroil barcha chegaralarni kesib o‘tdi. Biz zulmga qarshi harakat qilishni boshlaymiz. Biz Falastin shaharlari va Quddusni qat’iyat bilan himoya qilamiz", dedi Erdog‘an Qurbon hayiti boshlanishi munosabati bilan televizion murojaatida.
Unga ko‘ra, u 19 mamlakat prezidentlari va hukumat rahbarlari bilan G‘azo sektoridagi vaziyat bo‘yicha muzokaralar o‘tkazdi.
Isroil G‘azo sektorida quruqlikdagi operasiyaga tayyorlanmoqda. Ikki tomondan qo‘shinlar chegara tomon harakatlanmoqda. Isroil mudofaa kuchlari vakili Jonatan Konrikusning so‘zlariga ko‘ra, jangga kirish buyrug‘i hali chiqarilmagan.
"Isroilni to‘xtatish insoniyatning burchidir. Biz xalqaro hamjamiyatni harakatga chaqiramiz. BMTning ishtiroki – bu asosiy shart. Zudlik bilan nimadir qilish kerak, aks holda oqibatlari dahshatli bo‘ladi", deb qo‘shimcha qildi Turkiya rahbari.
Shuningdek, u "butun dunyo Isroilning Falastinga qarshi tajovuziga ko‘z yumsa ham, Turkiya buni qabul qilmaydi", dedi. "Qon to‘kilishiga javoban jim turadiganlar, bo‘layotgan voqealarni ochiqdan-ochiq himoya qilayotganlar bir kun kelib navbat o‘zlariga kelishini bilishlari kerak", dedi Erdog‘an.
