Иқлим ўзгариши туфайли шимолий ҳудудларга тропик ёмғир таҳдид солиши кутилмоқда
Риверсайддаги Калифорния университети америкалик олимлари карбонат ангидрид ташламалари тропик ёмғирларнинг масштаби келгуси ўн йилликларда шимолга силжишига олиб келишини маълум қилдилар. Бу экваториал камари ва дунёнинг кўплаб мамлакатлари қишлоқ хўжалиги иқтисодиётига катта таъсир кўрсатади. Тадқиқот Nature Climate Change илмий журналида чоп этилган .
Мутахассисларнинг фикрига кўра, ёғингарчиликнинг силжиши атмосферадаги углероднинг тропик конвергенция зоналарининг шаклланишига таъсири билан боғлиқ бўлади. Нам ҳаво юқорига кўтарилиб совиганида, момақалдироқ ҳосил бўлиб, кучли ёмғир ёғдиради. Шундай қилиб, интертропик конвергенция зоналари дунёдаги ёғингарчиликнинг учдан бир қисмини таъминлайди.
Ўзгаришлар туфайли экваторнинг ҳар икки томонидаги тропик минтақалар, шу жумладан Марказий Африка мамлакатлари, Жанубий Американинг Шимолий қисми ва Тинч океанидаги орол давлатлари энг кўп зарар кўради. Бу, глобал озиқ-овқат бозорига таъсир қилиши мумкин, чунки бу ҳудудларда қаҳва, какао, банан, шакарқамиш, чой, манго, ананас етиштирилади, шунингдек палма ёғи ҳам ишлаб чиқарилади.
Прогнозга кўра, тропик ёмғирнинг шимолга силжиши тахминан 20 йил давом этади, шундан сўнг океаннинг жанубий қисмларининг исиши конвергенция зоналарини тескари йўналишда кучайтиради ва уларни яна минг йиллик даврда сақлайди.
