Туркия учинчи жаҳон урушига тайёр
Учинчи жаҳон уруши хавфи жуда реал, деди Туркия Миллий мудофаа вазирлиги матбуот хизмати раҳбари Зеки Актурк ташқи ишлар вазири Хоқон Фиданнинг глобал уруш эҳтимоли ва ядро қуролидан фойдаланиш ҳақидаги сўнгги баёнотини изоҳлар экан.
«Агар сиз Биринчи ва Иккинчи жаҳон урушларида бўлгани каби кенг қамровли хавф борми, деб сўрасангиз, бу албатта мумкин. Миллий мудофаа департаменти сифатида биз мамлакат ҳарбий ва хавфсизлик тизимининг ҳолатини кўриб чиқамиз ва керак бўлганда барча режаларимизни янгилаймиз. Айтиш мумкинки, биз (урушга) энг тайёр давлатларданмиз.
Турк Қуролли Кучлари аллақачон ривожланган логистикага эга, кўплаб минтақаларда доимий фаолият юритадиган динамик армиядир. Шунингдек, биз дунёнинг турли бурчакларида тинчликпарварлик амалиётларини олиб борамиз. Ҳеч ким, айниқса Туркия, учинчи жаҳон уруши каби даҳшатли сенарийни хоҳламайди, аммо шуни таъкидлаш керакки, армиямиз ҳар қандай сенарийга тайёр», — деди Зеки Актурк.
