Миср-Европа Иттифоқи конференциясида 67,7 миллиард евролик келишувлар имзоланди
Қоҳирада бўлиб ўтган конференция натижасида Миср ва Европа Иттифоқи ўртасида умумий қиймати 67,7 миллиард евро бўлган 35 та битим имзоланди. Бу ҳақда Миср бош вазири Мустафо Мадбули маълум қилди.
Ўтган ҳафта охирида бўлиб ўтган конференцияда Миср президенти Абдел Фаттоҳ ас-Сиси, Европа комиссияси раҳбари Урсула фон дер Ляйен ва Миср Бош вазири Мустафо Мадбули иштирок этди.
Европа Иттифоқининг Қоҳирадаги делегациясининг баёнотида айтилишича, конференция «Миср ва Европа Иттифоқи ўртасида 2024 йил март ойида сиёсий ва иқтисодий соҳаларда келишилган стратегик ва кенг қамровли ҳамкорликнинг биринчи муҳим натижаларидан бири»дир.
Миср президенти конференцияда сўзлаган нутқида унинг мамлакати билан Европа Иттифоқи ўртасидаги муносабатлар ҳамкорликнинг турли йўналишларида ривожланиб бораётганини таъкидлади.
Ас-Сиси ўтган йилнинг март ойида сиёсий декларация имзоланганини, ундан мақсад икки томон ўртасидаги муносабатларни стратегик ва кенг қамровли шериклик даражасига кўтариш эканини эслатди.
Конференциянинг якуний йиғилишида сўзга чиққан Бош вазир Мадбули, ЕИ билан қўшма ҳамкорликни қўллаб-қувватлаш учун ҳар йили конференция ўтказиш истагида эканликларини билдирди.
Унинг таъкидлашича, конференцияда «яшил водород, электр транспорт воситалари, инфратузилма, барқарор транспорт, алоқа ва ахборот технологиялари» каби соҳаларда умумий қиймати 67,7 миллиард евро бўлган 35 та битим имзоланган.
