Samarqandda savdo majmuasida yong‘in sodir bo‘ldi

Bugun, 12-may kuni tungi soat 00:33 da Samarqand viloyati Qo‘shrabot tumani "Namuna" MFY Ergashjumal Bul-bul ko‘chasida joylashgan "Entrogroplyus" MCHJga qarashli ikki qavatli savdo majmuasida yong‘in sodir bo‘layotganligi to‘g‘risida tuman FV bo‘limiga xabar kelib tushgan.

Voqea joyiga 7 ta yong‘in-qutqaruv ekipajilari jalb etilgan. Yong‘inga soat 00:42 da yetib borgan va soat 03:52 da yong‘in to‘liq bartaraf etilgan.

Yong‘in natijasida savdo majmuasining taxminan 250 kv.m maydonda shift, tom qism, birinchi qavatda oziq-ovqat mahsulotlari, mayishiy texnikalari va boshqa turdagi jihozlar yonib zararlangan.

Hodisa oqibatida halok bo‘lgan va jabrlanganlar yo‘q.

Hozirda yong‘inning kelib chiqish sababi va keltirilgan moddiy zarar miqdori aniqlanmoqda.