Namangandan shikoyat: tez tibbiy yordam xodimlariga ajratilgan rag‘batlantirish pullari to‘liq berilmayapti
Xabaringiz bor, “Koronavirus infeksiyasi tarqalishiga qarshi kurash, aholining sanitariya-epidemiologik osoyishtaligi va salomatligini saqlashga jalb qilingan tez tibbiy yordam xodimlarini qo‘shimcha moddiy rag‘batlantirish to‘g‘risida” Hukumat qarori (458-son, 30.07.2020 y.) qabul qilingan edi.
Qarorga muvofiq, koronavirus infeksiyasi tarqalishiga qarshi kurash, aholining sanitariya-epidemiologik osoyishtaligi va salomatligini saqlashga jalb qilingan tez tibbiy yordam xodimlari quyidagi miqdorda bir martalik moddiy rag‘batlantiriladi:
🔸 vrachlarga – 5 mln so‘m;
🔸 o‘rta tibbiyot xodimlari (feldsherlar va sanitarlar)ga 4 mln so‘m;
🔸 haydovchilarga – 3 mln so‘m.
Ammo "Aniq.uz"ga yo‘llangan murojaatga ko‘ra, Namangan viloyati, To‘raqo‘rg‘on tumanida tez tibbiy yordam xodimlariga, xususan, hamshiralarga belgilangan bir martalik rag‘batlantirish pullari to‘liq berilmagan. Murojaat muallifi hamshiralarga 2 mln atrofida pul berilganini aytmoqda.
P/S. Bu borada aniq xulosa chiqarish fikridan yiroqmiz. Boisi, haqiqat Yaratganga va tegishli odamlargagina ma’lum. Umid qilamiz, tegishli tashkilotlar ushbu holat bo‘yicha munosabat bildirishadi va kerakli choralarni ko‘rishadi.
