Yangi O‘zbekiston inson qadri ulug‘, huquqlari qadr topgan, dunyoga ochiq mamlakatga aylanmoqda

Bundan besh yil muqaddam — 2016 yil 4 dekabr kuni xalqimiz o‘z xohish-irodasini ochiq-oshkora namoyon qilgan va ertangi taraqqiyotimiz, chiroyli turmushimiz, mamlakatimiz farovonligini ta’minlashga qodir, millatni, xalqni saodat sari yetaklay oladigan Prezidentini saylagan edi. O‘z-o‘zidan, shu kundan boshlab davlatimiz tarixida yangi bir bosqich boshlangandi.

Ko‘p millatli xalqimiz Shavkat Mirziyoyev rahbarligida tinch va osuda hayot kechirishiga, O‘zbekiston hayotida olamshumul, keng ko‘lamli o‘zgarishlar amalga oshirilishiga ishondi va shunday ham bo‘ldi. O‘zbekiston o‘z taraqqiyotida yangi bosqichga qadam qo‘ydi. Xalqimizni ko‘p yillardan buyon o‘ylantirib, tashvishga solib kelayotgan muammolar qisqa fursatda hal etildi, xalqimizning xohish-istaklari, orzu-umidlari ro‘yobga chiqa boshladi.

Joriy yil 24 oktyabr kuni umume’tirof etilgan xalqaro standartlar hamda demokratik tamoyillar asosida bo‘lib o‘tgan Prezident saylovida xalqimiz yana bir karra saylash huquqidan samarali foydalandi va o‘z taqdiri, farzandlari kelajagi, oilalari farovonligi uchun siyosiy yetakchini, oqil rahbarni tanladi.

Bu beshta siyosiy partiyadan ko‘rsatilgan nomzodlar orasida yurtdoshlarimiz amaldagi Prezident Shavkat Mirziyoyevni haqiqiy kuchli yetakchi sifatida bilgani, so‘nggi besh yilda amalga oshirilgan islohotlardan, har bir sohada kuzatilayotgan ijobiy o‘zgarishlardan mamnunligi, davlatimiz rahbarining odilona va oqilona siyosatidan roziligidan dalolatdir.

Nega desangiz, keyingi besh yilda O‘zbekistonda erishilgan marralar haqida so‘z yuritsak, ularni sanab adog‘iga yetolmaymiz, yozishga esa qog‘ozimiz yetmaydi. Bu shiddatli islohotlar ulkan bunyodkorlik, obodonchilik ishlari, inson manfaatlari ulug‘langani va xalq bilan muloqotning yangi tizimi joriy etilgani bilan hayotda o‘zining yorqin ifodasini topdi.

Bugun yurtimiz qanday katta yutuq va marralarga erishganining tasdig‘ini anglash uchun oxirgi besh yilda qo‘lga kiritilgan natijalar, Vatanimizning bugungi salohiyati va o‘sish sur’atlarini o‘zida yaqqol ifoda etadigan ko‘rsatkichlarga e’tibor qaratish o‘rinlidir. Bu aholi daromadlarining izchil o‘sayotgani, odamlarning shaxsiy uy-joy va sifatli iste’mol tovarlari bilan ta’minlanayotgani, yashash uchun zarur infratuzilmaning kengayib borayotganida namoyon bo‘layotir. Buning isbotini odamlar hayotida, turmushida his qilayotgani va buni hozir har qadamda e’tirof etayotgani misolida ham ko‘rish mumkin.

Aytish joizki, shu davrda inson huquq-erkinliklari va manfaatlari oliy qadriyat sifatida belgilanib, amalda unga rioya etila boshlandi. Sud va huquqni muhofaza qiluvchi organlar faqat jazolovchi emas, balki huquq va manfaatlarimizning haqiqiy himoyachisiga aylandi. Jamiyatda huquqiy ong va huquqiy madaniyatni yuksaltirish davlat siyosati darajasiga ko‘tarildi.

O‘ksik qalblardagi muzlar eridi

Xalq bilan muloqot hayotdagi muammolarni oydinlashtiradi. O‘tgan davrda O‘zbekistonda inson huquq va erkinliklari, qonun ustuvorligi, ochiqlik va oshkoralik, so‘z erkinligi, majburiy mehnatga chek qo‘yish va ochiq siyosat yuritish bo‘yicha erishilgan yutuqlarni bugun xalqaro hamjamiyat Prezident Shavkat Mirziyoyev nomi bilan bevosita bog‘liq ekanini alohida e’tirof etmoqda.

Har bir inson yaxshi yashashi, hayoti go‘zal mazmun kasb etishi — oliy qadriyat. Ular ertaga emas, bugun yaxshi yashashni istaydi. Davlatimiz rahbari prezidentlik faoliyatining ilk kunlaridayoq xalqimizga tinch va osuda hayot kechirishi uchun yaxshi sharoit yaratib berishni maqsad qildi va mamlakatimizda amalga oshirilayotgan islohotlar ana shu ezgu maqsad-muddaoga qaratildi.

Prezidentimiz qayerga bormasin, aholi bilan uchrashib, ularning xohishistaklari, qiziqishlari, duch kelayotgan muammolariga alohida e’tibor berdi, mahallama-mahalla yurib, odamlarning dardu tashvishini eshitdi. Shu orqali odamlar qalbiga yo‘l topildi. Qahraton qishdan so‘ng chiqqan oftob nurlari butun borliqqa jon bag‘ishlagani kabi o‘ksik qalblardagi muzlar eridi. Natijada odamlarning ruhiyatida katta o‘zgarish yuz berdi. Fuqarolarning ijtimoiy faolligi ortdi, siyosiy xabardorlik darajasi ko‘tarildi.

Shu davr mobaynida nafaqat odamlarning har lahza og‘ir tegirmon toshidek yelkasida yuk bo‘lib kelgan eng katta muammosiga yechim topildi, shu bilan birga, xalq hayotidan uzilib qolgan ayrim rahbarlar xalq ichida yurishga, fuqarolar bilan yuzma-yuz uchrashib, ularning dardu tashvishi bilan yashashga o‘rgandi. Bu tufayli aholining yashash sharoitlari tubdan yaxshilandi, turmush tarzi va darajasida sezilarli ijobiy o‘zgarishlar sodir bo‘ldi. Eng muhimi, ularning kayfiyati, dunyoqarashi va hayotga munosabati o‘zgarib, ertangi kunga mustahkam ishonch paydo bo‘ldi.

Izchillik va qat’iyat bilan hayotga joriy etilgan Harakatlar strategiyasi doirasida yigirma besh yil davomida bo‘lmagan ishlar qilindi, desak ayni haqiqat. Davlatimiz rahbarining “Xalq davlat idoralariga emas, davlat idoralari xalqimizga xizmat qilishi kerak”, degan xalqchil da’vatlari amaliy harakatga aylandi. Xalq bilan muloqotning mutlaqo yangi tizimi, yangi instituti yaratildi. O‘zbekiston Respublikasi Prezidentining virtual qabulxonasi, joylarda xalq qabulxonalari tashkil etilib, yurtdoshlarimiz o‘zining yillar davomida yig‘ilgan muammolariga yechim topa boshladi.

Yangi mexanizm yordamida o‘n minglab, yuz minglab odamlarning muammolari hal etildi. Hokimiyat va fuqarolar o‘rtasidagi muloqot umuman boshqacha ko‘rinish kasb etib, rahbar va amaldorlarni aholiga yaqinlashtirdi. Davlatimiz rahbarining qat’iy siyosiy irodasi bilan mamlakatimizda inson huquqlari va kafolatlari kuchaytirilib, majburiy mehnatga, shu jumladan, bolalar mehnatiga butunlay barham berildi.

Ilgari o‘qituvchilar, tibbiyot xodimlari va boshqa ijtimoiy soha vakillari bolalarni o‘qitish, bemorlarni davolash o‘rniga butun kuzni paxta dalasida o‘tkazgan bo‘lsa, keyingi yillarda yurtimizda ta’lim va tarbiya masalasi umummilliy harakatga aylandi.

O‘qituvchining mavqeini yuksaltirish, ustoz-muallimlarga munosib shart-sharoitlar yaratish maqsadida pedagog xodimlarning ish haqi bosqichma-bosqich oshirib borilmoqda. Yoshlarning iqtidori va salohiyatini to‘g‘ri yo‘naltirish, umumta’lim fanlarini o‘qitishning butunlay yangicha tizimi yaratildi.

Yana bir hayotiy misol. Bir vaqtlar bozorga borib, kiyim-kechak yoki oziqovqat xarid qilmoqchi bo‘lsak, sotuvchi “Aka, pulingiz naqdmi yoki plastik?”, deb so‘rardi. Agar plastik, desak, “Unda mahsulot ustiga 10 yoki 15 foiz qo‘shib berasiz”, derdi. Bu ham yetmaganidek, kartadagi pulimizni naqdlashtirishda ne-ne qiyinchiliklarga duch kelganmiz. Oylik maoshimiz tushdi, deguncha bozorga yoki biror-bir benzin quyish shoxobchasiga yugurardik. Maoshimizning 20, hattoki 30 foizini tadbirkorga berishga majbur bo‘lardik. Eng yomoni, plastik kartalardan to‘lov aksar joylarda qabul qilinmasdi, qo‘limizda pulimiz bo‘la turib, uni ishlata olmasdik. Bu faqat mening emas, millionlab odamlarning og‘riqli muammosi edi. Mamlakatimiz rahbarining siyosiy irodasi bilan bu muammolar bugun tarixga aylandi. Hozir yurtimizning qaysi hududiga bormang, fuqarolarimiz naqd pulni bemalol yigirma to‘rt soat davomida bankomatdan yechib olmoqda.

Prezidentimiz tashabbusi bilan ilgari tarixda bo‘lmagan sektorlar tizimi joriy qilinishi esa davlat organlarini aholi bilan yanada yaqinlashtirish, xalq bilan tizimli muloqotni yo‘lga qo‘yishda muhim omil bo‘lmoqda. Jamiyatda kambag‘allik va ishsizlikka barham berishni ko‘zda tutuvchi, aholining eng qiynalgan, sharoiti og‘ir qatlamini qamrab oluvchi “Temir daftar”, “Ayollar daftari”, “Yoshlar daftari” kabi daftarlar ham mazmun-mohiyatiga ko‘ra, juda sodda va shu bilan birga, samarali usul ekani allaqachon isbotlandi. Uning berayotgan ijobiy hosilalarini bugun fuqarolarimiz o‘z hayotida his etib turibdi.

E’tiborga molik tomoni, ishlash, pul topish uchun xorijga ketayotgan fuqarolarimizga munosabat butkul o‘zgardi. Ularning chet elda huquqlari poymol bo‘lishining oldini olish, ijtimoiy muhofazasini ta’minlash, tashkillashtirilgan migrasiyani yo‘lga qo‘yish bo‘yicha mutlaqo yangi tizim yaratildi. Rossiya, Qozog‘iston, Turkiya, Yaponiya va Birlashgan Arab Amirliklari bilan mehnat migrasiyasi borasida xalqaro shartnomalar imzolandi.

Albatta, bularning hammasi davlatimizning mehnat migrantlari masalasiga jiddiy e’tibor qaratayotganini ko‘rsatadi, O‘zbekiston fuqarolari qayerda yashashi va ishlashidan qat’i nazar, davlatimiz rahbarining e’tiborida va nazoratida ekani, Prezident ularning barchasini o‘z farzandidek ko‘rishidan dalolat beradi.

Adashib, yomon yo‘lga kirib qolgan vatandoshlarimizga dushman ko‘zi bilan qarash emas, aksincha, kechirimli bo‘lish, ularga insoniylikning eng yuksak namunasini ko‘rsatish davlatimiz rahbarining yana bir muhim islohotlaridan biri bo‘ldi. Mamlakatimiz tarixida ilk bor “Mehr” operasiyasi besh marotaba amalga oshirilib, Suriya, Iroq va Afg‘onistondan ko‘plab fuqarolarimiz, asosan, ayollar va bolalar Vatanimizga olib kelindi.

Bundan anglashiladiki, yangi O‘zbekiston inson huquqlari sohasidagi xalqaro majburiyatlariga qat’iy sodiq qoladi. Zotan, davlatimiz rahbari shu yilning 6 noyabr kuni O‘zbekiston Respublikasi Prezidenti lavozimiga kirishishiga bag‘ishlangan tantanali marosimdagi nutqida kelgusi besh yilga mo‘ljallangan ustuvor yo‘nalishlar haqida to‘xtalib, xalqimiz talablarini inobatga olgan holda, Yangi O‘zbekiston taraqqiyot strategiyasi ishlab chiqilgani va saylov jarayonida u o‘ziga xos umumxalq muhokamasidan o‘tkazilganini ta’kidladi.

Bu muhim konseptual hujjatda islohotlarimizning uzviyligi va davomiyligini ta’minlash maqsadida “Harakatlar strategiyasidan — Taraqqiyot strategiyasi sari” degan tamoyil asosiy g‘oya va bosh mezon sifatida kun tartibiga qo‘yilgani esa O‘zbekistonning islohotlar yo‘lini qat’iyat bilan davom ettirishi va mantiqiy yakuniga yetkazishiga ishoradir.

Ko‘p yillik orzular ro‘yobi

Inson borki, o‘z uyi bo‘lishini orzu qiladi, buning uchun tinmay mehnat qiladi, intiladi. Buni uysizlik, ijarama-ijara, sarson bo‘lib yashash azobini boshidan kechirgan yaxshi biladi. Agar inson o‘z uyiga ega bo‘lsa, hayotda katta maqsadlar bilan yashaydi, oilasida tinchlik, ishida unum bo‘ladi. Vatanli bo‘lish baxti esa kishiga o‘zgacha ruhiyat baxsh etadi. Zero, uy-joy inson hayotining uzviy va ajralmas bir qismi bo‘lib, u jamiyatda erkin hayot kechirishning garovidir.

Shu bois, oxirgi yillarda aholining ijtimoiy himoyalanmagan va kam ta’minlangan toifalarini uy-joy bilan ta’minlashga qaratilgan salmoqli ishlar amalga oshirildi. Odamlarni eng ko‘p tashvishga solayotgan uy-joy masalasi davlat siyosatining ustuvor vazifalaridan biri sifatida belgilandi.

Qisqa vaqt ichida mamlakatimiz ulkan qurilish maydoniga aylandi. So‘nggi yillarda yurtimizda ipoteka dasturlari doirasida 140 mingdan ortiq xonadonli uy-joylar barpo etildi. Bu undan oldingi yillarga qaraganda 10 martadan ham ko‘p. Natijada uzoq yillar boshpanasiz bo‘lgan yuzlab, minglab oilalar shaxsiy uy-joylarga ega bo‘ldi.

Pandemiya tufayli ko‘plab davlatlarning “beli bukilib”, qator ijtimoiy dasturlardan voz kechishga majbur bo‘layotgan, ayniqsa, uy-joy qurilishi keskin qisqarayotgan bir paytda Prezidentimiz tomonidan O‘zbekistonda bunyodkorlik ishlari ko‘lami tobora kengayayotgani zamirida mamlakat taraqqiyoti va farovonligini oshirishga qaratilgan ko‘plab ezgu maqsadlar mujassamdir.

Yurtimizda har yili 300 mingga yaqin nikoh qayd etilmoqda. Bu kelgusi besh yilda aholi soni 38 millionga yetadi degani. Demak, uylar qurilishi ko‘lamini shunga muvofiq kengaytirib borish lozim bo‘ladi.

Prezidentimiz eng muhim vazifalardan biri sifatida uy-joy masalasini hal etish yuzasidan kelgusida hududlarda 1 milliondan ortiq aholi uchun barcha qulaylik va ijtimoiy infratuzilmaga ega bo‘lgan “Yangi O‘zbekiston” massivlari bunyod qilinishi, “Obod mahalla”, “Obod qishloq” dasturlari izchil davom ettirilishini bildirdi. Bu esa yillar davomida ijarama-ijara, sarson-sargardon yurgan ming-minglab insonlar qalbiga ishonch tuyg‘usini olib kirdi.

Uyi bor odamning o‘yi bo‘lmaydi, ko‘ngli to‘q bo‘ladi, kelajakka ishonch bilan qaraydi, katta maqsadlarni dilga tugib, bunyodkorlikka, yaratuvchanlikka intilib yashaydi. Boshqacha aytganda, uy-joy shunchaki boshpana emas, u insonning ko‘nglidagi ma’naviy qo‘rg‘on hamdir. Ushbu qo‘rg‘oni but insonlarning oilasi mustahkam bo‘ladi, ishiga baraka inadi.

Insonlar hayotini yorishtirgan
o‘zgarishlar

Ilgari viloyatdan kelib Toshkent shahridagi oliy o‘quv yurtlarida tahsil olgan yoshlar borki, o‘qishni tamomlagach poytaxtda qolishga harakat qilardi. Lekin propiska muammosi tufayli ularning ko‘pchiligi yana viloyatiga qaytishga majbur bo‘lardi.

“Tabib tabib emas, boshidan o‘tkazgan tabib” deganlaridek, bu muammoni men ham bir paytlar o‘z boshimdan o‘tkazganman. O‘qishni tamomlaganimdan so‘ng ish qidirib bir nechta tashkilotning eshigini qoqdim, qaysi bir idoraga bormay “oliy ma’lumotli ekansiz, sizdek yosh kadrlar bizga juda kerak. Lekin Toshkent shahrida doimiy yoki vaqtincha propiskangiz bormi? Hech bo‘lmaganda vaqtincha propiska qilib keling, shundan so‘ng sizni ishga qabul qilamiz”, deya javob berardi.

O‘sha kezlarda vaqtinchalik propiska qildirish ham juda azob edi. Unga hujjat yig‘gunga qadar ne-ne azoblarni boshimizdan kechirganmiz. Chunki vaqtincha ro‘yxatga qo‘yish uchun ham bir necha turdagi hujjatlar talab etilardi. Buning azobini propiskaga mas’ul bo‘lgan idora oldida hujjat qo‘ltiqlab uzundan-uzoq navbatda turganlar, kunlab-oylab bu sargardonlikdan boshi chiqmaganlar yaxshi biladi. Shu sababli ushbu muammo ko‘p yillardan buyon fuqarolarimiz va jamoatchilikning haqli noroziligiga sabab bo‘lib kelayotgandi. Aholining eng og‘riqli muammolaridan biri edi, bu masala.

Prezidentimizning siyosiy irodasi va chinakam xalqparvarliklari tufayli endi u kunlar ortda qoldi. Propiska tizimi islohotlari bilan aholini doimiy ro‘yxatga olish tartib-taomillari liberallashtirildi. Muammolarning birin-ketin hal etilishi tom ma’noda, xalqimiz hayotini yorishtirdi, ta’bir joiz bo‘lsa, farovon qildi, qalblarga iliqlik baxsh etdi.

Islohotlar natijasi chekka
hududlarda bo‘y ko‘rsatmoqda

Iqtisodiy rivojlanish, avvalo, qishloq joylarni rivojlantirishdan, qishloq odamlari hayot darajasini oshirishdan boshlanishi yaxshi ma’lum. Shu bois, Prezidentimiz tashabbusi bilan aholining yashash sharoitini yanada yaxshilash bo‘yicha aniq, maqsadli tizim yaratildi.

Xalqimizni hayotdan rozi qilishning, yurtimiz yangi qiyofasini yaratishning eng samarali mexanizmlaridan biriga aylanib ulgurgan “Obod qishloq”, “Obod mahalla” dasturlari doirasida mamlakatimizning ko‘plab qishloq, mahalla va ovullaridagi millionlab insonlar hayotida tub o‘zgarishlar amalga oshirildi.

Hududlarni kompleks rivojlantirish maqsadida ulardagi yo‘l-transport infratuzilmasi, uhandislik-kommunikasiya tarmoqlari va ijtimoiy soha ob’ektlarida qurilish va obodonlashtirish ishlari amalga oshirilib, uy-joylar ta’mirlandi, ichimlik suv va elektr energiyasi tarmoqlari yangilandi.

Bundan uch-to‘rt yil muqaddam Mo‘ynoq desa, tuz koniga aylangan olis tuman ko‘z oldimizda gavdalanar edi. Odamlar Mo‘ynoqda dengiz emas, balki cho‘l bor, deb aytishardi. Bugun bu yerdagi o‘zgarishlar insonlar qalbida hayotga, kelajakka katta umid uyg‘otmoqda. Sababi, keyingi yillarda Orol fojiasidan jabr ko‘rgan aholining yashash sharoitini yaxshilash bo‘yicha, ta’bir joiz bo‘lsa, odamlarning yetti uxlab tushiga ham kirmaydigan olamshumul o‘zgarish va yangilanishlar bo‘y ko‘rsatmoqda.

2017–2020 yillarda 5 million aholi yashaydigan 1 ming 200 ta mahalla va qishloq qiyofasi tubdan o‘zgargan bo‘lsa, joriy yilda bu dasturning ko‘lami bir necha bor kengayib, barcha tuman va shaharlardagi 8 mingga yaqin qishloq va mahallada 21 trillion so‘mlik qurilish, ta’mirlash va obodonlashtirish ishlari amalga oshirilmoqda. “Obod qishloq”, “Obod mahalla” dasturlari asosida qurilayotgan, ta’mirlanayotgan guzar va qishloqlar, yangi madaniyat va istirohat bog‘lari ertangi kunimiz porloq ekanidan darak bermoqda.

Millatni jipslashtirgan yil

O‘tgan yili yurtdoshlarimiz uchun ham, jahon ahli uchun ham og‘ir keldi. Koronavirus balosi, u keltirgan ijtimoiy-iqtisodiy inqiroz yetmaganidek, bir hafta ichida Buxoro va Sirdaryo viloyatlarida tabiiy-texnogen ofatlar ro‘y berdi. Kutilmaganda yuz bergan bunday talafotlar el-yurtimizni yana bir bor jiddiy sinovdan o‘tkazdi.

Aholi punktlari, ijtimoiy soha ob’ektlari, ekin maydonlariga katta zarar yetdi. Yuzlab odamlar uysiz va boshpanasiz qoldi. Taassufki, bu hodisalar basma-bas ro‘y berdi. Shunday og‘ir va murakkab sharoitda davlatimiz rahbarining shaxsan o‘zlari har ikki hududga zudlik bilan yetib borib, vaziyatni o‘z nazoratiga oldi. Zarar ko‘rgan aholi bilan uchrashib, ular bilan suhbatlashdi, tashvishlariga sherik bo‘ldi. Eng katta og‘irlikni o‘z yelkasiga olib, talafot oqibatlarini bartaraf etgan holda, hayotni tiklash ishlariga bosh-qosh bo‘ldi.

Qisqa fursatda Sardoba tumanining “Do‘stlik”, Mirzaobod tumanining “Haqiqat” hamda Oqoltin tumanining “Navbahor” mahallasida ko‘p qavatli uy-joylar barpo etildi. Ilgari bu joylardagi ko‘p uylarda tabiiy gaz bo‘lmagan bo‘lsa, endi gaz, suv, elektr energiyasi va boshqa kommunikasiyalar bilan to‘liq ta’minlangan. Yangi mavzeda mahalla guzari, do‘kon, kutubxona, bolalar maydonchalari barpo etilgan. Uylarga xizmat ko‘rsatuvchi servis kompaniyasi tashkil qilingan.

Pandemiya sabab ko‘plab davlatlarda odamlar ishsiz, oziq-ovqatsiz qolgan bir paytda, bizda minglab xorijdagi vatandoshlarimiz olib kelindi, ularga ish o‘rni yaratildi. Shunday og‘ir kunlarda davlatimiz, Prezidentimiz hech bir fuqaroni himoyasiz qoldirmadi, o‘z holiga tashlab qo‘ymadi. Hatto eng oddiy, ko‘pchilik e’tiborga olmaydigan jihatlar ham nazardan chetda qolmadi.

Tariximizda yangi davrning
boshlanishi

Albatta, o‘tgan tarixan qisqa davrda islohotlar tufayli erishgan natijalarimiz haqida uzoq gapirish mumkin. Chunki shu davrda O‘zbekistonda yuz bergan o‘zgarish va yangiliklarni nafaqat yurtdoshlarimiz, balki dunyo hamjamiyati va chet el ommaviy axborot vositalari qo‘llab-quvvatlamoqda.

Mamlakatimiz rahbari bu demokratik o‘zgarishlarni kimlargadir yoqish, maqtanish, turli reytinglarga kirish uchun emas, aksincha, xalqimizning bugungi hayoti va ertangi istiqbolini o‘ylab, milliy manfaatlarimiz yo‘lida amalga oshirmoqda.

Bugun yangi O‘zbekistonni demokratiya, inson huquq va erkinliklari borasida umume’tirof etilgan norma va prinsiplarga qat’iy amal qilgan holda, jahon hamjamiyati bilan do‘stona hamkorlik tamoyillari asosida rivojlanadigan, pirovard maqsadi xalqimiz uchun erkin, obod va farovon hayot yaratib berishdan iborat bo‘lgan davlat, deya baralla ayta olamiz. Bunga yetarlicha asoslar ham bor. Har bir muvaffaqiyat, har bir marra zamirida Prezidentimizning mashaqqatli mehnati, cheksiz zahmati va uzoqni ko‘zlab olib borgan dono siyosati mujassam.

Bir so‘z bilan aytganda, O‘zbekiston yana bir uyg‘onish davriga qadam qo‘ydi. Yangi besh yilda mamlakatimiz inson qadri ulug‘, huquqlari qadr topgan buyuk davlatga aylanishi muqarrar. Zotan, Prezidentimiz ta’kidlaganidek, “Biz — dunyoga, dunyo — bizga ochiq bo‘lishi kerak. Bugungi hayot, bugungi taraqqiyotning talabi ham aslida shu. Biz ana shu hal qiluvchi tamoyilni albatta hayotimiz qoidasiga aylantiramiz”.