Erdo‘g‘an va Tramp o‘rtasidagi suhbat ortida nima bor?

Turkiya prezidenti Rajab Toyyib Erdo‘g‘an AQSh prezidenti Donald Tramp bilan telefon orqali muloqot o‘tkazdi, deya xabar bermoqda Anadolu.

Ma’lum qilinishicha, suhbat davomida rahbarlar Turkiya va AQSh o‘rtasidagi ikki tomonlama munosabatlar, mintaqaviy va global muammolarni muhokama etishgan.

Prezident Erdo‘g‘an Turkiya va AQSh ikki ittifoqchi sifatida yangi davrda hamkorlikni rivojlantirishiga to‘la ishonch bildirdi.

Turkiya davlat rahbari mintaqaviy va global voqealar Turkiya va AQSh o‘rtasida barcha masalalar bo‘yicha maslahatlashuvlarni kengaytirishni taqozo etayotganini ta’kidladi.

Uning aytishicha, Turkiya AQSh prezidenti Trampning Rossiya va Ukraina o‘rtasidagi urushni to‘xtatish bo‘yicha qat’iy va bevosita tashabbuskor qadamlarini qo‘llab-quvvatlamoqda. Erdo‘g‘an, Turkiya urush boshlanganidan beri adolatli va barqaror tinchlikka intilganini va bundan buyon ham shunday bo‘lishini ta’kidladi.

Erdo‘g‘an Suriyadagi vaziyatga to‘xtalar ekan, vaziyatni normallashtirish uchun Suriyada barqarorlikni tiklash, yangi ma’muriyatning ishlashi va Suriyaga qarshi sanksiyalarni bekor qilishga birgalikda hissa qo‘shish muhimligini ta’kidladi. Uning fikricha, bu suriyaliklarga o‘z vatanlariga xavfsiz qaytish imkonini beradi.

Turkiya prezidenti yangi davrda AQShdan Turkiya manfaatlarini hisobga olgan holda terrorizmga qarshi kurash bo‘yicha qadamlar kutilayotganini ta’kidladi. Ikki davlat o‘rtasida mudofaa sanoati sohasidagi hamkorlikni rivojlantirish uchun CAATSA sanksiyalarini bekor qilish, F-16 samolyotlarini sotib olish jarayonini yakunlash va Turkiyaning F-35 dasturidagi ishtirokini tiklash kerak.