FIDE reytingi yangilandi: O‘zbekistonning besh nafar shaxmatchisi top 100 likdan joy oldi
![FIDE reytingi yangilandi: O‘zbekistonning besh nafar shaxmatchisi top 100 likdan joy oldi FIDE reytingi yangilandi: O‘zbekistonning besh nafar shaxmatchisi top 100 likdan joy oldi](/photos/news/4TtxkgDlv9NB61z.jpeg)
Jahon shaxmat federasiyasi iyun oyi yakunlangach, o‘z reytingini yangiladi. Ushbu yangilangan jahon reytingida kuchli 100 likdan 5 nafar o‘zbekistonlik grossmeyster o‘rin oldi.
Foto: FIDE
Reytingda Nodirbek Abdusattorov 6-o‘rinda qayd etildi. U avvalgi oydagi o‘rnidan bir pog‘ona pastladi. Javohir Sindorov 54-o‘ringa ko‘tarildi. U o‘tgan oydagi reytingda 60-o‘rinda qayd etilgan edi. Bundan tashqari, eng kuchli shaxmatchilar reytingida Rustam Qosimjonov (43-o‘rin) ham o‘rin olgan. Avvalgi oyda kuchli 100 likni tark etgan Nodirbek Yakubboyev ushbu oyda 84-o‘rinda qayd etilgan. Uzchess Cup turnirida muvaffaqiyatli qatnashgan yana bir o‘zbekistonlik shaxmatchi eng kuchli 100 shaxmatchilar kiritilgan reytingdan joy oldi. 2643 reyting ochkosiga ega shaxmatchi Shamsiddin Vohidov 95-o‘rinda qayd etilgan.
Nodirbek yoshlar o‘rtasidagi rasmiy reytingda 1-o‘rinda qayd etilgan. Yana bir hamyurtimiz Javohir Sindorov 6-o‘rinni egallab turibdi.
Foto: FIDE
Ma’lumot uchun, Mukofot jamg‘armasi 166 ming AQSh dollarini tashkil etadigan “Uzchess Cup” turnirida Nodirbek Abdusattorov ikkinchi o‘rinni qo‘lga kiritdi.
Foto: Grandchesstour
Ruminiya poytaxti Buxarest shahrida Grand Chess Tour 2024 musobaqasining ikkinchi bosqichi bo‘lib o‘tmoqda. Yakunlangan 6 turdan so‘ng Nodirbek Abdusattorov 2,5 ochko to‘plab, 8-o‘rinda bormoqda.