Швеция Ливандаги элчихонасини ёпди

Ливан пойтахти Байрутдаги Швеция элчихонаси вақтинча ёпилади. Ходимлардан Кипрга боришни сўралди. Бу ҳақда Швеция Ташқи ишлар вазири Тобиас Биллстрём маълум қилди.

“Сабаби шундаки, минтақадаги хавфсизлик билан боғлиқ вазият ниҳоятда хавотирли ва можаро авж олиш хавфи бор”, дейди вазир.

Швециянинг Байрутдаги элчихонасида олти киши ишлайди. Биллстрём ходимлар Ливанни қандай, қачон ва қанча муддатга тарк этишларини тушунтирмади.

Тахминларга кўра, гап август ҳақида кетяпти, аммо бу муддат хавфсизлик ҳолатига қараб узайтирилиши мумкин.