Ukraina Rossiyani mag‘lub etish rejasini tayyorladi. U 4 banddan iborat

Ukraina AQSh prezidenti Jo Baydenga Rossiya ustidan g‘alaba qozonishi uchun to‘rtta asosiy bandni o‘z ichiga olgan reja tayyorladi. Bu haqda Ukraina prezidenti devoni rahbari maslahatchisi Mixail Podolyak ma’lum qildi.

Podolyakning so‘zlariga ko‘ra, rejaning bandlaridan biri Ukraina Qurolli kuchlarining Kursk viloyatiga hujumi bo‘lgan. Prezident devoni rahbari maslahatchisining ta’kidlashicha, bu operasiya go‘yoki Ukraina qo‘shinlari zarur resurslarga ega bo‘lsa, jangovar aloqa chizig‘idagi voqealarni nazorat qilish qobiliyatini ko‘rsatadi.

Rejaning ikkinchi bandi iqtisodiy tarkibiy qismga asoslanadi. Podolyakning aytishicha, Ukraina g‘alaba qozonishi uchun Rossiya Federasiyasiga qarshi sanksiyalar samaradorligini tahlil qilish, shuningdek, Yevropa kompaniyalarining Rossiya bozoridagi faoliyatini davom ettirish masalasini hal qilish zarur.

Ukraina prezidenti devoni rahbari maslahatchisining qo‘shimcha qilishicha, g‘alaba qozonish uchun Ukraina ham NATOdagi o‘z o‘rnini va global xavfsizlikning aniq tuzilmasini aniqlashi zarur. Podolyak tilga olgan yana bir jihat Rossiyaga o‘z sheriklari tomonidan diplomatik bosim bo‘ldi.

27 avgust kuni Ukraina prezidenti Vladimir Zelenskiy «g‘alabaga erishish rejasi» borligini aytdi. Shuningdek, u buni Bayden va AQSh prezidentligiga Demokratik va Respublikachilar partiyalaridan nomzodlar Kamala Xarris va Donald Trampga ko‘rsatishga tayyorligini ma’lum qildi.