Uch yoshli payg‘ambar
Payg‘ambarlik buyuk ne’mat bo‘lib, Alloh tanlagan eng ulug‘ insonlargagina nasib etgan. Shu bilan birga, o‘ta mas’uliyatli vazifa hamdir. Payg‘ambar Alloh bilan bandalar orasidagi vositachi hisoblanadi. Shu bois bu vazifa insondan katta salohiyat va yuksak iqtidor talab etadi. Aksariyat olimlar ittifoqiga ko‘ra, hech kim qirq yoshdan oldin payg‘ambar bo‘lmagan. Faqat Yahyo va Iso alayhimussalom bundan mustasno.
Chunki Alloh taolo Yahyo alayhissalomni uch yoshligida, Iso alayhissalomni esa beshikdalik chog‘idayoq payg‘ambar qilib yuborgan. Bu ham Allohning mo‘’jizasi. Shu o‘rinda savol tug‘ilishi mumkin: “Yosh payg‘ambarlar qanday xususiyatga ega bo‘lishgan? Ularning boshqa payg‘ambarlardan farqi nimada?” Bu o‘rinda uch yoshida payg‘ambarlik sharafiga muyassar bo‘lgan Yahyo alayhissalom misolida mazkur savolga javob izlashga harakat qilamiz.
Alloh taolo Qur’oni karimda mazkur payg‘ambar haqida bunday marhamat qilgan: «(Biz Yahyo alayhissalomga): “Ey Yahyo! Kitobni (ya’ni Tavrotni) jiddiylik bilan qo‘lga ol!” (dedik) va unga go‘daklik chog‘idayoq hikmat (va ilm) ato etdik. Yana unga O‘z dargohimizdan mehr hamda poklik (ato etdik) va u taqvoli bo‘ldi. U ota-onasiga mehribon bo‘ldi, jabr qiluvchi, itoatsiz bo‘lmadi. Unga tug‘ilgan kunida ham, vafot etadigan kunida ham, qayta tiriladigan (qiyomat) kunida ham salom (omonlik) bo‘lur» (Maryam surasi, 12-15-oyatlar).
Hikmat
Alloh taolo Yahyo alayhissalomga go‘dakligidayoq hikmat ato etdi. “Hikmat”dan murod payg‘ambarlikdir. Olimlarning ta’kidlashicha, hikmat Allohning Kitobini o‘qib-tushunish, aql va ilm demakdir. Mazkur oyat Yahyo alayhissalomning bolalik davridayoq payg‘ambar maqomiga erishganidan darak beradi. Bu vaqtda Yahyo alayhissalom uch yosh bo‘lgan. Alloh taolo bilan vahiy orqali muloqot qilgan, Tavrotni qiynalmay o‘qigan, undagi ta’limotlar mohiyatini to‘liq anglab yetgan, mukammal aql va yetuk ilm sohibi bo‘lgan. Yahyo alayhissalomning tengdoshlari: “Yur, birga o‘ynaymiz” deganda, u zot: “Men o‘yin uchun yaralmaganman!” der edilar.
Mazkur oyatda Alloh Yahyo alayhissalomga Tavrotni mahkam ushlab, payg‘ambarlik ishlariga sabr va jiddiyat bilan yondashishga, Tavrotdagi buyruqlarni sabr ila bajarishga buyurmoqda. Alloh mazkur oyatda Yahyo alayhissalomga Tavrotni yodlashni buyurgan.
Farzandingiz hikmat va ilm sohibi bo‘lishini istaysizmi? Unda Ibn Abbos roziyallohu anhuning quyidagi so‘zlariga quloq tuting: “Balog‘atga yetmagan bola Qur’on o‘qishni o‘rgansa, u ham Yahyo alayhissalomdek hikmat nuri ato qilinganlar qatorida bo‘ladi”.
Mehr, poklik va taqvo
Alloh taolo Yahyo alayhissalomga mehr-shafqat, muhabbat, poklik, barcha yaxshilik va barakalarni ato qilgan. Ya’ni, Alloh taolo Yahyo alayhissalomni insonlarni hidoyatga boshlovchi muborak zot qilib qo‘ydi. Demak, rahm-shafqat va poklik ham Alloh taolo tomonidan berilar ekan. Farzandlari mehrsiz va toshbag‘ir bo‘lib o‘sayotganidan yoki nojo‘ya ishlarga qo‘l urishga odatlanib qolganidan shikoyat qilgan ota-onalar o‘zlariga bir savol bersinlar: “Men Allohdan farzandlarimga mehr-shafqat va poklik so‘rab duo qildimmi?! Ularga shunday duo qilishni o‘rgatdimmi?!”
Ota-onaga mehribon, jabr va gunohdan yiroq
Yahyo alayhissalom yoshlik chog‘idanoq taqvodor, ota-onasiga mehribon, Allohga itoatkor va xoksor bo‘lgan. Jabrning asl ma’nosi g‘azab vaqtida birovni urish yoki o‘ldirib qo‘yishni anglatadi. Shuningdek, jabr qahr qiluvchi ma’nosiga ham ega. Yahyo alayhissalom o‘zgalarga qo‘pol muomala qiluvchi va odamlarni gunoh-ma’siyatga chorlaguvchi bo‘lmagan, g‘azab tufayli noqulay holatlarga tushib qolmagan, osiylik qilmagan, ya’ni gunohga qo‘l urmagan va gunoh ishga rag‘bat ham qilmagan.
Omonlik
Alloh taolo Yahyo alayhissalomga tug‘ilgan chog‘ida, vafot etganida va Qiyomat kuni qayta tirilganida ham salom yo‘llagan. Imom Moturidiyning ta’kidlashicha, mazkur oyatdagi salom uch xil ma’noni ifodalashi mumkin:
Birinchisi, yaxshilikdir. Ya’ni, Alloh taolo mazkur uch holatda Yahyo alayhissalomga butun yaxshiliklarni ravo ko‘rmoqda. .
Ikkinchi ma’nosi, sano va maqtov. Alloh taolo Yahyo alayhissalomga hayotining boshidan oxirigacha va oxirat kunida ham sano va maqtov aytmoqda.
Uchinchi ma’nosi, shaytondan omonlikdir. Ya’ni, Alloh taolo Yahyo alayhissalomni tug‘ilish va vafot etish chog‘ida shaytonning vasvasasidan asrashini aytmoqda. Zero, mazkur holatlarda shayton insonning qalbiga g‘ulg‘ula solishga astoydil harakat qiladi. Chaqaloq tug‘ilayotganda shayton uning yo‘liga to‘g‘anoq bo‘lib, iloji boricha bolaga zarar yetkazishga harakat qiladi.
Rasululloh sollallohu alayhi va sallamdan rivoyat qilingan ushbu hadis bunga yaqqol dalil bo‘la oladi: “Har bir yangi tug‘ilgan chaqaloqni shayton, albatta, ushlaydi. Shunda chaqaloq chinqirib yig‘lab yuboradi”.
Demak, Alloh taolo Yahyo alayhissalomni shaytonning bu zararlaridan omondan saqlagan. Ba’zilarning xayolidan: “Ha endi, Yahyo alayhissalom payg‘ambar bo‘lganlar. Shuning uchun u zotga mazkur afzalliklar ato qilingan. Biz esa oddiy odamlarmiz. Payg‘ambarlarga xos bunday imtiyozlarni faqat orzu qilishimiz mumkin, xolos”, degan fikr o‘tishi mumkin. Vaholanki, oldingi payg‘ambarlarga berilgan imtiyozlar bizga, ya’ni Muhammad sollallohu alayhi va sallamning ummatlariga ham ato qilingan!
“Rasululloh sollallohu alayhi va sallam Fotima roziyallohu anhoning tug‘ilish vaqti yaqinlashganda Ummu Salama va Zaynab bint Jahsh roziyallohu anhumoni uning huzuriga yuborib, Oyatul Kursiy (Baqara surasi, 255-oyat), A’rof surasi, 54-oyat va Falaq hamda Nos suralarini o‘qishga buyurganlar. Bir hadisda bunday deyilgan: “Kim farzand ko‘rsa va o‘ng qulog‘iga azon hamda chap qulog‘iga takbir aytsa, bolaga Ummu sibyon (chaqaloqlarga zarar beruvchi jin) zarar bermaydi” (Imom Bayhaqiy rivoyati).
Yahyo alayhissalomning bolalikdagi o‘ziga xos xususiyatlari ham biz uchun ham katta maktab vazifasini o‘taydi. U zotning hayot tarzidan farzandga ilm va ma’rifat o‘rgatish, uni mehribon va itoatkor qilib tarbiyalash hamda sog‘lom va barkamol bo‘lib voyaga yetishida o‘zimizga yarasha xulosa chiqaramiz.
Manba: hidoyat.uz