Rahbar qamoqda, Telegram esa mashhurlikka erishmoqda

Telegram asoschisi va rahbari Pavel Durovning Fransiyada hibsga olinishi ilovaning mashhurligiga ta’sir qildi - u voqeadan oldingiga qaraganda tez-tez yuklab olina boshladi.

Hozirda Telegram yuklab olishlar soni ortib bormoqda, bu esa uni App Store'ning ijtimoiy media bo‘limida №2 ilovaga aylantirmoqda.

Telegram'ning yuksalishi Durov hibsga olinganidan so‘ng darhol sodir bo‘lmadi, buni messenjer rahbari haqidagi yangiliklarning butun dunyo bo‘ylab asta-sekin tarqalishi bilan izohlash mumkin.

Appfigures ilova tahlil kompaniyasining xabar berishicha, Telegram dushanba kuni soat 03:00 da AQSh App Store do‘konida ijtimoiy media jadvalida 2-o‘rinni egallagan va bu tendensiyaning boshlanishi, xolos.

Durov hibsga olingan Fransiyada ilova App Store do‘konidagi ijtimoiy tarmoq bo‘limida birinchi o‘ringa ko‘tarildi, shuningdek, barcha toifadagi ilovalar reytingida uchinchi o‘rinni egalladi.

Eng yaxshi ilovalar jadvalida (bu o‘yinlarni o‘z ichiga olmaydi) Telegram juma kunidan beri AQShda 18-o‘rindan 8-o‘ringa, ya’ni 10 pog‘onaga ko‘tarildi.