Ijaraga berilgan darsliklarni yo‘qotgan o‘quvchilar jarima to‘laydimi?
- O‘zbekiston Respublikasi Xalq ta’limi vazirligi va bir qator hamkor tashkilotlarning 2014 yil 20 martdagi “Umumta’lim maktablarini darsliklar va o‘quv-metodik qo‘llanmalar bilan ta’minlash tartibi to‘g‘risidagi nizomni tasdiqlash haqida” qo‘shma qarori bilan tasdiqlangan nizomda bu haqda tushuntirish berilgan.
Unga ko‘ra, nizomning 51-bandida darsliklar yoki o‘quv metodik qo‘llanmalardan (O‘MQ) foydalanish usulidan qat’iy nazar, ular yo‘qolgan yoki foydalanishga yaroqsiz holatga kelib qolgan taqdirda, o‘quvchining ota-onasi yoki ularning o‘rnini bosuvchi shaxslar yoxud homiylar yoki o‘qituvchilar zararni xuddi shunday darslik yoki O‘MQlar bilan qoplaydi yoxud uning birlamchi hujjatlarda (hisob-fakturada, yuk xatida) ko‘rsatilgan qiymatini quyidagi miqdorlarda to‘laydi:
1-sinf o‘quvchilarining har bir darslik va (yoki) O‘MQlari uchun — uning bir baravari miqdorida;
2-4-sinf o‘quvchilarining har bir darslik va (yoki) O‘MQlari uchun — uning ikki baravari miqdorida;
5-9-sinf o‘quvchilarining har bir darslik va (yoki) O‘MQlari uchun — uning to‘rt baravari miqdorida.