Durov Rossiya ma’lumotlarini G‘arbga aytadimi? Narishkin Durovning jim bo‘lishiga umid qilmoqda

Rossiya tashqi razvedka xizmati direktori Sergey Narishkin Telegram asoschisi Pavel Durovning Fransiyada hibsga olinishi bilan bog‘liq vaziyatga izoh berdi. «U bunga yo‘l qo‘ymaydi, deb umid qilaman», dedi Narishkin Durovning Rossiyaga tegishli ma’lumotlarni G‘arbga uzatishi mumkinligi haqidagi TASS savoliga javoban.

Rossiya rasmiylari, urush tarafdori bo‘lgan bloggerlar va axborot resurslari Durovning Parijda hibsga olinishiga keskin munosabat bildirishdi va buni so‘z erkinligiga hujum deb baholadilar. Ba’zi «harbiy muxbirlar» Durov shifrlash kalitlarini G‘arb razvedka xizmatlariga o‘tkazishi mumkinligidan qo‘rqishdi, bu ularning fikricha, messenjerdan frontda faol foydalanayotgan Rossiya armiyasiga zarba beradi.

❕ Tergov sudyasi Durovni hibsda saqlash muddatini 96 soatga uzaytirishga ruxsat berdi, bu uning 28 avgustgacha hibsda qolishi mumkinligini anglatadi. Telegram asoschisi hozirda tergovchilar tomonidan so‘roq qilinmoqda.