Toshkent metrosida ilk bor bepul Wi-Fi ishga tushdi
Toshkent metropolitenining ikkita bekatida bepul Wi-Fi tarmog‘idan foydalanish imkoniyati paydo bo‘ldi.
UzNews.uz muxbirining xabar berishicha, Wi-Fi tajriba tariqasida Paxtakor va Alisher Navoiy bekatlarida ishga tushirilgan.
Yuqorida aytilgan bekatlar markaziy bekatlardan hisoblanadi. Qatnovning tig‘iz paytlarida 500ga yaqin foydalanuvchilar Wi-Fi tarmog‘iga ulanishi kuzatilmoqda. Kelgusida biz jamoat Wi-Fi tarmog‘ini Toshkent metropolitenining barcha bekatlarida ishga tushirmoqchimiz , deya ma’lum qilishdi Metrotelecom TM vakillari.
Qayd etish joiz, foydalanuvchilar operatorning media portaliga tashrif buyurish imkoniyatiga ham ega bo‘lishadi. Unda onlayn TV, film, musiqa va kitoblarni ko‘rish hamda yuklab olish imkoniyati mavjud bo‘ladi.
