Iqtisodiyot va sanoat vazirligi tashkil etildi
Iqtisodiy rivojlanish sohasida davlat siyosatini amalga oshirish tizimini tubdan takomillashtirish chora-tadbirlari to‘g‘risidagi Prezident Farmoni qabul qilindi.
Bu haqda Adliya vazirligining Telegram kanalida xabar berilmoqda.
Farmonga muvofiq, Iqtisodiyot vazirligi Iqtisodiyot va sanoat vazirligi etib qayta tashkil etildi.
Xususiy tadbirkorlikni rag‘batlantirish, ishbilarmonlik muhitini yaxshilash va xufyona iqtisodiyotni qisqartirish vazirlikning asosiy vazifasi etib belgilandi.
Shuningdek, vazirlik mamlakatni ijtimoiy-iqtisodiy va industrial rivojlantirish sohasida davlat siyosatini, shuningdek investisiya siyosatining strategiyasini ishlab chiqish va amalga oshirish bo‘yicha vakolatli organ etib belgilandi.
Endilikda, barcha normativ-huquqiy hujjat loyihalarini Iqtisodiyot va sanoat vazirligi bilan kelishish hujjat Adliya vazirligiga huquqiy ekspertizadan o‘tkazish uchun kiritishdan oldin amalga oshiriladi.
Kichik sanoat zonalari hududida qiymati 7 mln AQSh dollaridan yuqori bo‘lgan investisiya loyihalarini amalga oshirish bo‘yicha qarorlar vazirlik bilan kelishiladi.
Vazirlik 2019 yil 1 iyungacha O‘zbekiston Respublikasini 2030 yilgacha ijtimoiy-iqtisodiy rivojlantirish Konsepsiyasi loyihasini ishlab chiqadi.
Shuningdek, Farmon bilan Prognozlashtirish va makroiqtisodiy tadqiqotlar instituti tarkibida Xodimlarning malakasini oshirish o‘quv markazi tashkil etildi.
Kichik sanoat zonalari ishtirokchilari uchun imtiyoz va preferensiyalar amaldagi ishtirokchilar uchun 2020 yil 1 yanvargacha saqlab qolgan holda bekor qilindi.
Shuningdek, kichik sanoat zonalari ishtirokchilari uchun quyidagi huquqlar berildi:
- bino va inshootlarga mulk huquqini rasmiylashtirish;
- investisiya va ijtimoiy majburiyatlarni to‘liq bajargan taqdirda o‘zlariga berilgan binolar va inshootlarni xususiylashtirish;
- rekonstruksiya qilish yoki kapital ta’mirlashni o‘z mablag‘idan amalga oshirgan taqdirda, binolar va inshootlarni xususiylashtirish.
Manba: uznews.uz
