Ўзбекистон делегацияси ФАТФнинг навбатдаги Ялпи мажлисида иштирок этди
Жорий йилнинг 23-28 июнь кунлари Сингапур давлатида Жиноий даромадларни легаллаштиришга қарши курашишда молиявий чоралар ишлаб чиқувчи гуруҳнинг (ФАТФ) Ялпи мажлиси бўлиб ўтди.
Ушбу халқаро тадбирда 100 дан ортиқ давлатдан ташриф буюрган 400 нафар вакиллар ҳамда бир қатор халқаро ташкилотлардан (БМТ, Жаҳон банки, ЕХҲТ, ОТБ, ЕОТБ, Эгмонт, Интерпол ва бошқалар) экспертлар қатнашди.
Ялпи мажлисда жиноий даромадни легаллаштириш ва терроризмни молиялаштиришга қарши курашиш Глобал тизимининг 30 дан ортиқ муҳим масалалари кўриб чиқилди.
Ялпи мажлис доирасида Ўзбекистон делегацияси томонидан Сингапур Тижорий ишлар департаменти директори ўринбосари Жасмин Чер хоним билан икки томонлама учрашуви ташкил этилди.
Учрашувда, Ўзбекистон Республикаси Президентининг 2024 йил 16 январдаги "Яширин иқтисодиётга қарши курашиш соҳасида давлат назорати механизмларини такомиллаштириш чора-тадбирлари тўғрисида"ги Фармони ижросини таъминлаш мақсадида, яширин иқтисодиётга қарши курашишда Сингапур тажрибасини ўрганиш, миллий тизимга мазкур соҳадаги етакчи мутахассисларини жалб қилган ҳолда уларнинг илғор тажрибаларини амалиётга жорий этиш масалалари кўриб чиқилди.
Бу каби, халқаро тадбирларда Ўзбекистон делегациясининг иштирок этиши соҳадаги халқаро стандартларни миллий қонунчиликка самарали татбиқ қилишга, халқаро ва идоралараро ҳамкорликни такомиллаштиришга ҳамда халқаро майдондаги Ўзбекистон имиджини ошишига хизмат қилади.
