БМТнинг иқлим ўзгариши бўйича конвенцияси доирасида ёшлар конференцияси бўлиб ўтди
Тошкент вилоятининг Бўстонлиқ туманида 2024 йилги Бутунжаҳон ёшлар фестивали доирасида иқлим ўзгариши бўйича ёшлар конференцияси бўлиб ўтди. Тадбир Экология, атроф-муҳитни муҳофаза қилиш ва иқлим ўзгариши вазирлиги ҳамда Ёшлар ишлари агентлиги томонидан ташкил этилди.
Фестивалда 120 нафар маҳаллий ва халқаро ва иштирокчилар, жумладан, “New Climate Innovation Center” МЧЖ асосчиси, Пан Ги Мун «Фаровон келажак учун» жамғармаси директорлар кенгаши директори Раэквон Чанг, Осиё тараққиёт банкининг (ОТБ) Ўзбекистондаги ваколатхонаси раҳбари Канокпан Лао-Араяа, шунингдек, Ёшлар музокарачилари академияси ҳаммуассиси Веэна Балакришна иштирок этди.
Конференциядан кўзланган мақсад ёшларнинг иқлим ўзгариши муаммолари бўйича хабардорлиги ва билимини ошириш, иқлим бўйича ташаббусларда иштирокини кенгайтириш, етакчилик қобилиятини ривожлантириш, тажриба ва илғор тажриба алмашиш учун платформа яратишдан иборат.
Ўзбекистонда иқлим ўзгариши бўйича ёшлар конференцияси мамлакатимизда иқлим ўзгаришига қарши кураш бўйича ислоҳотлар ва миллий стратегияни амалга оширишда муҳим ўрин тутади. Фестивалда ёшларнинг иштироки иқлим муаммоларини ҳал этиш, иқлим ўзгаришига мослашиш ва иссиқхона газлари чиқиндиларини камайтириш бўйича янги ёндашувларни шакллантиришга хизмат қилади.
“Иқлимга оид фавқулодда ҳолатларга қарши курашиш учун зарур бўлган углерод нейтраллигига фақат ҳукумат ёки бизнес томонидан эришиб бўлмайди. Ёш авлод углерод нейтраллиги учун масъулиятни ҳис қилиб, «Биринчи мен» тамойилига амал қилган ҳолда ўз тақдирини ўзи бошқариши вақти келди. Бугунги ёшлар келажакдаги муаммоларни бошқалар ҳал қилишини кутмаслиги, ўз келажагини ўзи бошқариши керак”, – деди Пан Ги Мун «Яхши келажак учун» жамғармаси ижрочи директори Раэквон Чанг.
Таъкидлаш жоизки, ҳозирги вақтда иқлим ўзгаришига қарши курашиш Ўзбекистонда давлат сиёсатининг устувор йўналишларидан бирига айланиб, иқлим ўзгаришининг салбий оқибатларини минималлаштириш бўйича тизимли ёндашув ва самарали чоралар кўришни тақозо этади. Шу нуқтаи назардан, нафақат Ўзбекистонда, балки бутун Марказий Осиёда муҳим экологик, ижтимоий-иқтисодий, илмий-техникавий муаммоларни самарали ҳал этишга қодир бўлган янги авлод етакчилари, менежерлари ва мутахассисларини тайёрлаш муҳим аҳамиятга эга. Ўзбекистон Республикаси Президенти Шавкат Мирзиёев ташаббуси билан Ўзбекистонда “Green University”нинг очилиши ҳам иқлим ўзгариши ва атроф-муҳит муаммоларини ҳал этишда таълим муҳим эканлигини таъкидлайди.
Бундан ташқари, иқлим бўйича музокарачилар гуруҳининг яратилиши миллий ва халқаро иқлим форумларида иштирок этиш учун зарур кўникмаларга эга бўлган етакчиларнинг янги авлодини тайёрлашга, авлодлараро мулоқот ва глобал иқлим бўйича музокараларда ёшларни қўллаб-қувватлашга ёрдам беради.
Бироқ, иқлим ўзгаришини муваффақиятли ўрганиш учун чуқур фундаментал тадқиқотлар талаб этилади. Бунинг учун илмий ва академик салоҳиятни ошириш, шунингдек, фанни иқлим ўзгариши бўйича Миллий стратегияга интеграция қилиш бўйича саъй-ҳаракатлар талаб этилади. Шу нуқтаи назардан, «Греэн Университй»да иқлимшунослик резиденциясини яратиш режалаштирилмоқда, у иқлим фанлари соҳасида ҳамкорликда тадқиқотлар олиб бориш ва инновацион ечимларни ишлаб чиқиш учун маҳаллий ва халқаро экспертлар, тадқиқотчилар ва олимларни жалб қилади.
«Осиё тараққиёт банки UNICEF томонидан маъқулланган Болалар, ёшлар ва иқлим бўйича ҳаракатлар декларациясини қўллаб-қувватлайди. Биз ижобий ўзгаришларни илгари суриш ва соғлом сайёрани тарғиб қилишда муҳим ўрин тутаётган Ўзбекистон ёшларини қўллаб-қувватлаймиз», – деди Осиё тараққиёт банкининг (ОТБ) Ўзбекистондаги ваколатхонаси раҳбари Канокпан Лао-Арая.
Тадбир, шунингдек, дунёнинг турли бурчакларида, жумладан, Ўзбекистонда ёшлар томонидан аниқланган иқлим муаммоларини акс эттирувчи харитани ишлаб чиқишга туртки бўлди. Ёшларнинг шахсий масъулият ва фаол ҳаракатларини рағбатлантириш орқали углерод изини камайтиришга қаратилган асосий ташаббуси – “Me First Pledge” дастурини ишлаб чиқиш ва ишга туширишга алоҳида эътибор қаратилди.
