Toshkent shahar festivalida eng yaxshi yosh qo‘shiqchilar, raqqoslar va ko‘cha rassomlari aniqlanadi (VIDEO)
21 maydan 25 mayga qadar yoshlar uchun keng miqyosdagi tadbir Toshkent Besh tashabbus harakati bo‘lib o‘tadi va uning doirasida 16 yoshdan 30 yoshgacha bo‘lgan yigit-qizlar o‘zlarini Tashkent Voice Fest - vokal ijrochilar tanlovi, Tashkent Dance Fest - raqqoslar tanlovi hamda Street Art – ko‘cha san’atkorlari tanlovida o‘zlarini namoyon etishlari mumkin.
Tadbir tashkilotchisi – poytaxt hokimiyati.
Tashkent Voice Fest
Vokal ijrochilarning katta tanlovi Toshkentning eng yaxshi va iqtidorli qo‘shiqchilarini aniqlab beradi. Tanlov qatnashchilari videoarizalar yordamida saralab olinadi. Eng yaxshilar jonli eshituvga taklif qilinadi.
Maxsus tuzilgan professional jyuri ijroni uchta mezon bo‘yicha baholaydi: bu vokal ijro mahorati, artistizm va ijroning badiiy ishontiruvchanligi. Qo‘shiqlar istalgan janr va tilda ijro etilishi mumkin.
Hozirga qadar tanlov tashkiliy qo‘mitasiga tadbir saytida mavjud Telegram-bot orqali 100dan ortiq videoarizalar kelib tushgan.
Toshkent Besh tashabbus harakatining barcha mehmonlari katta sahnada bo‘lib o‘tadigan hayajonli chorak final, yarim final va final batllari tomoshabiniga aylanish imkoniyatiga ega.
Tanlovga mashhur jurnalist va prodyuser Nikita Makarenko rahbarlik qiladi.
Tashkent Dance Fest
Raqs tanlovi poytaxtning barcha ko‘zga tashlangan raqqoslarini jamlaydi.
Tomoshabinlar Hip-Hop, Dancehall va Break Dance uslubidagi batllar guvohiga aylanishadi. Ular yakkaxon hamda jamoa tarzida musobaqaga kirishadi.
Tanlov 4 bosqichda o‘tadi: bu onlayn-saralash, raqs asosida saralash, yarim final va final.
Ishtirokchilarni saralashda barcha bosqichlarda jyuri raqqosning musiqaviyligi, raqs ijro etish texnikasi va uslubni bilish darajasini hisobga oladi.
Ro‘yxatga olingan ishtirokchilar soni 50 nafardan oshdi.
Bu tanlovga taniqli xoreograf Sergey Zlotnikov rahbarlik qiladi.
Street Art
Yosh iqtidorli rassomlar o‘z qobiliyatlarini Street Art – zamonaviy tasviriy san’at tanlovida namoyish etishi mumkin.
Onlayn saralashdan so‘ng tanlovga 8 kishi taklif etiladi va ular tadbir boshlanishga qadar maxsus devorlarda o‘z ijod namunalarini yaratishadi. So‘ng tomoshabinlar orasida ovoz berish jarayoni o‘tkazilib, uning yakunlariga ko‘ra g‘olib aniqlanadi.
Tanlovda qatnashish uchun o‘z ishlarini 50dan ortiq yosh rassomlar yuborishga ulgurgan.
Street Art - ko‘cha rassomlari tanlovi uchun onlayn-ro‘yxatga olish 10-may sanasida tugaydi.
Vokal ijro va raqs tanlovlari uchun arizalar qabul qilish 15-mayga qadar davom etadi.
16 may kuni jyuri Tashkent Dance Festda qatnashish uchun qatnashchilarni onlayn-arizalar asosida saralab oladi.
Xuddi shu kuni jyuri videoarizalarni ko‘rib chiqadi va Tashkent Voice Fest saralashining ikkinchi bosqichiga o‘tishi mumkin bo‘lgan vokal ijrochilarni tanlaydi. Jonli eshituv 17 may kuni bo‘lib o‘tadi.
Tanlovlarga ro‘yxatdan o‘tish tadbirning rasmiy saytida - www.toshkent21.uz hamda Telegram-bot yordamida amalga oshiriladi.
