Peskov: "Zelenskiyning Rossiya Federasiyasiga zarba berish haqidagi bayonotlari mojaroning kuchayishiga olib keladi"

Ukraina prezidenti Vladimir Zelenskiyning NATO sammitidagi qurol yetkazib beruvchilarni Rossiya hududiga zarba berish bo‘yicha har qanday cheklovlarni bekor qilishga chaqirishi provokasiondir va keskinlikning yangi bosqichiga olib keladi.

Bu haqda Rossiya prezidenti matbuot kotibi Dmitriy Peskov ma’lum qildi.

"Biz NATO sammiti doirasidagi barcha bayonotlar va barcha ma’lumotlarni diqqat bilan kuzatib bordik. Bu mavzu juda provokasion. Biz ba’zi poytaxtlar vakillarining bayonotlarini ko‘ramiz, masalan, London bu borada hech qanday cheklovlarni ko‘rmaydi. Muvozanatni saqlab qolishga urinayotgan va rejimning bunday liberallashuviga – uzoq masofaga uchuvchi raketalardan foydalanishga qarshi ekanini aytayotgan davlatlar ham bor. Lekin asosiysi, bu raketalar allaqachon bizning hududimizga – Lugansk, Donesk, Xerson va Zaporojyega zarba bermoqda. Masofani oshirishga kelsak (Rossiya Federasiyasiga chuqur zarba berish) – bu sof provokasiya va keskinlik kuchayishining yangi, o‘ta xavfli raundi", — dedi Peskov jurnalistlarga brifing chog‘ida.

Avvalroq, Kreml rasmiy vakili AQShning Germaniyada uzoq masofali raketalarni joylashtirish rejalarini sharhlar ekan, G‘arb bilan munosabatlarda "sovuq urushning qarama-qarshilik va to‘g‘ridan-to‘g‘ri qarama-qarshilik bilan barcha atributlari" qaytib kelayotganini aytdi.