Isroilda iste’foga chiqish davom etmoqda: kim o‘z lavozimini tark etmoqda?

Isroil polisiyasi razvedka boshqarmasi boshlig‘i Dror Asaraf iste’foga chiqish niyatida ekanligini ma’lum qildi.

Bu qaror Isroil xavfsizlik idoralari va harbiy departamentidagi iste’folar to‘lqini fonida qabul qilindi.

Avvalroq Isroil quruqlik qo‘shinlari qo‘mondoni general-mayor Tamir Yaday iste’foga chiqishini ma’lum qilgandi.

Seshanba kuni Isroil Shimoliy okrugi polisiyasi qo‘mondoni Shuki Taxauko 35 yillik faoliyatidan so‘ng o‘z lavozimini tark etishga qaror qilgani ma’lum bo‘ldi.Isroil OAVlarining xabar berishicha, Isroilning 8200-bo‘linmasi qo‘mondoni Yossi Shariyel yaqin haftalarda iste’foga chiqishini e’lon qilishni rejalashtirmoqda.

Ynet nashriga ko‘ra, G‘azo armiyasi bo‘linmasi razvedka boshlig‘i ham o‘z lavozimini tark etishni rejalashtirmoqda.

Iyun oyida qo‘mondon brigada generali Avi Rozenfeld 30 yillik xizmatdan so‘ng Isroil armiyasidan iste’foga chiqqanini e’lon qildi.

Aprel oyida harbiy razvedka boshqarmasi boshlig‘i Aharon Xaliva 7 oktabr kuni Al-Aqsa to‘fonining oldini olmagani uchun iste’foga chiqqan edi.

Ma’lumotlarga ko‘ra, xuddi shu sababga ko‘ra, Isroil Bosh xavfsizlik xizmati rahbari Ronen Bar urushdan so‘ng darhol iste’foga chiqish niyatini bildirgan.

OAV xabarlariga ko‘ra, Isroil armiyasi shtab boshlig‘i Gerzi Halevi ham Xamas hujumlari oldidagi muvaffaqiyatsizliklar uchun javobgarlikni o‘z zimmasiga oldi va iste’foga chiqishi kutilmoqda.

Iste’folar Isroil ko‘plab jabhalarda, jumladan, bosib olingan G‘arbiy Sohilda kurashayotgan o‘ta nozik bir vaqtda sodir bo‘ldi.