Туркия Эрон билан нефть ва газ савдосини давом эттиради
Туркия Президенти Эрдўған, АҚШнинг санкциялари таҳдидига қарамай, Туркия Эрондан нефть ва табиий газ сотиб олишни тўхтатишнинг иложи йўқлигини, икки мамлакат ўртасидаги савдо-сотиқ давом эттиришини айтди.
NDTV телеканалининг хабар беришича, жума куни журналистлар билан суҳбатда Эрдўған, Туркия АҚШнинг Эрон билан савдо-сотиққа қарши санкцияларидан қўрқмаслигини айтди.
Унинг қўшимча қилишича, Анқара Теҳрон билан ҳамкорликни узмоқчи эмас.
Ўтган йили АҚШ Теҳрон ва дунё кучлари ўртасидаги 2015 йилдаги ядровий келишувдан чиқиб, бу мамлакатга нисбатан санкцсияларни қайтариб берган эди.
АҚШнинг Теҳронга қарши янги санкцияларидан олдин Анқара ва Теҳрон томонидан имзоланган узоқ муддатли етказиб бериш шартномалари шартларига кўра, Туркия 2026 йилгача 9,5 миллиард кубометр газ сотиб олиши керак эди.
