Собиқ президент нафақа талаб қилмоқда
Бир вақтлар Перуни бошқарган Альберто Фухимори конгрессга собиқ давлат раҳбари учун кўзда тутилган нафақа тайинланиши бўйича талабнома киритди. Ҳолбуки, у мамлакатдан 15 миллион доллар қарздор экан. Бу ҳақда “RPP” радиоси хабар тарқатган.
“Мен сизни қутлашдан мамнунман ва шу билан бирга республиканинг собик конституциявий президенти Альберто Фухиморига қонун билан белгиланган пенсия тайинлашингизни сўрайман”, — дейилади мамлакат собиқ раҳбари томонидан тақдим этилган аризада.
Радиостанция ахборотида таъкидланишича, аввал собиқ етакчи давлатга ўзи етказган 15 миллион доллар қийматидаги зарарни қоплаши керак.
Фухимори Перуга 1990-2000 йиллар президентлик қилган. 2007 йил декабрда ҳокимиятни суиистеъмол қилишда айбланиб, олти йилга озодликдан маҳрум этилган. 2009 йил эса унга “коррупция ва инсониятга қарши жинояти” сабаб 25 йиллик қамоқ жазоси тайинланган. 2017 йил декабрда собиқ президент хасталиги боис Президент Педро Пабло Кучински томонидан афв этилди. 2018 йил Перу олий суди ушбу қарорни бекор қилди. 2022 йил март ойида мамлакат конституцион суди Фухиморини иккинчи бор кечирди, бироқ бу ҳукм ижро этилмади. 2023 йил бешинчи декабрь куни конституцион суд уни зудлик билан турмадан чиқаришни буюрди ва эртаси куни собиқ президент озодликка чиқди.
