Xitoy O‘zbekistonda ijtimoiy ahamiyatga molik loyihalarni amalga oshirish uchun 37,5 mln. dollar beg‘araz yordam ko‘rsatadi
Joriy yilning 24 may kuni Investisiyalar va tashqi savdo vazirligida O‘zbekiston Respublikasi Hukumati va Xitoy Xalq Respublikasi Hukumati o‘rtasida Texnik-iqtisodiy hamkorlik to‘g‘risidagi bitimni imzolash marosimi bo‘lib o‘tdi.
Hujjat O‘zbekiston Respublikasi Investisiyalar va tashqi savdo vazirining birinchi o‘rinbosari A.Voitov va Xitoy Xalq Respublikasining O‘zbekiston Respublikasidagi Favqulodda va Muxtor elchisi Szyan Yan tomonidan imzolandi.
Bitim Xitoy Xalq Respublikasi Hukumati tomonidan O‘zbekiston Respublikasida ijtimoiy ahamiyatga molik loyihalarni birgalikda amalga oshirish uchun 250 mln. yuan (37,5 mln. dollar) miqdorida beg‘araz yordam ko‘rsatishni nazarda tutadi.
Bugungi kungacha ikki mamlakat o‘rtasidagi texnik-iqtisodiy hamkorlik doirasida sog‘liqni saqlash, ta’lim, qishloq va suv xo‘jaligi, madaniyat, transport va boshqa sohalarda loyihalar amalga oshirildi.
