Mixail Zamyatin: «Umid qilamanki, biz O‘zbekistonga xotirjamroq davrda sayyoh sifatida yana kelamiz»

Avval xabar berganimizdek, «COVID-19»ga qarshi kurashda yordam berish uchun bir oy oldin mamlakatimizga kelgan Rossiya Federasiyasining 40 nafarga yaqin tibbiyot xodimlaridan iborat guruh o‘z missiyasini yakunladi.

Ular ketishidan avval biz delegasiya rahbari – Rossiya Sog‘liqni saqlash vazirligining N.I.Pirogov nomidagi milliy tibbiy xirurgiya markazining anesteziologiya va reanimasiya kafedrasi boshlig‘i, tibbiyot fanlari doktori, professor, Rossiya Federasiyasining xizmat ko‘rsatgan shifokori Mixail Zamyatin bilan suhbatlashdik.

– Delegasiyangiz bir oy davomida mamlakatimizda bo‘lib, deyarli barcha hududlarda bo‘ldi. Sizningcha, bizning shifokorlarimizga qanday yordam bera oldingiz?

– Biz koronavirus infeksiyasiga qarshi kurashda shifokorlarga nazariy va amaliy yordam berish uchun keldik. O‘zbekistonlik hamkasblarimiz va bu yerga yordam berish uchun kelgan boshqa mamlakatlarning mutaxassislari bilan yelkama-elka ishlab, intensiv terapiya, reanimasiya bo‘limlari, qizil zonada bemorlarni bevosita ko‘rikdan o‘tkazdik va ularni davolash bo‘yicha tavsiyalarimiz bilan bo‘lishdik.

Butun dunyo ushbu virusga birinchi marta duch keldi, shuning uchun tibbiyot hamjamiyatini unga qarshi kurashda birlashtirish, ochiq munozaralar va koronavirus infeksiyasiga qarshi kurashda kompleks yondashuv uchun turli xil profil mutaxassislarining ishtiroki juda muhimdir. Avvalo, gap «COVID-19»ning turli shakllari bilan kasallangan bemorlarni davolashda tajriba, ishlanmalar, metodika va amaliyotlar almashinuvi haqida bordi.

Darhaqiqat, biz mamlakatingizning deyarli barcha hududlarida bo‘ldik, tajribamiz, bilimlarimiz bilan o‘rtoqlashdik, konsultasiyalarda, konsiliumlarda qatnashdik. Nafaqat bemorlarni, bevosita davolaydigan shifokorlar bilan ham dolzarb muammolarni muhokama qildik. Biz birlamchi tibbiy yordam ko‘rsatishda, qabul bo‘limlarida, epidemiyaga qarshi tadbirlarni tashkil qilish va tibbiyot xodimlarini himoya qilishda mavjud bo‘lgan masalalarni muhokama qildik. Ya’ni, koronavirus infeksiyasiga chalingan bemorlarga yordam ko‘rsatish yo‘lida juda qiyin va jiddiy vazifalar bilan bog‘liq bo‘lgan barcha mavzular bo‘yicha hamkorlik olib bordik.

– Bilamizki, bemorlarni davolashda bevosita ishtirok etishdan tashqari, guruh a’zolari bilan videokonferensiyalar ham tashkil qilingan.

– Darhaqiqat, biz videokonferensiyalarda ham qatnashdik. Bu orqali biz o‘z tajribamizni keng auditoriyaga yetkazish imkoniyatiga ega bo‘ldik. Shuningdek, bizning mutaxassislarimiz davolash bo‘yicha hujjatlar, yo‘riqnomalarni tayyorlash va takomillashtirishda faol ishtirok etishdi.Bir so‘z bilan aytganda, biz o‘z vazifamizni vijdonan bajarishga harakat qildik.

– Bu yerda bir oy ishlaganingizdan so‘ng, «COVID-19»ga qarshi kurash borasida mamlakatimizda olib borilayotgan ishlarni qanday baholaysiz?

– Shuni ta’kidlashni istardimki, O‘zbekiston koronavirus pandemiyasiga yaxshi tayyorgarlik ko‘rgan, tez va malakali karantin choralarini ishlab chiqilgan, shuningdek bemorlarga yordam berish uchun zarur infratuzilma yaratilgan. Bularning barchasi mamlakatda vaziyatni barqarorlashtirishga yordam bermoqda.

Masalan, Toshkentda qisqa muddat ichida ulkan bino – Zangiota tumanidagi yuqumli kasalliklar shifoxonasi barpo etilgan, u epidemiologik xavfsizlik va bemorlarga tibbiy yordam ko‘rsatishning barcha talablariga javob beradi. Ushbu inshootning faoliyati tufayli mamlakat koronavirus infeksiyasi xavfini kamaytirishga muvaffaq bo‘lmoqda. Mamlakat koronavirus infeksiyasiga qarshi kurashda turli tajribaga ega bo‘lgan qator mamlakatlar mutaxassislari uchun ochiqligi ham ahamiyatga molik.

Butun dunyoda bemorlarni davolash ma’lum protokollar asosida amalga oshiriladi, unda bemorni kasalxonaga yotqizish paytida ayrim tekshiruv turlari, davolanishning barcha kunlari davomida bemorni parvarish qilish tartiblari va terapiya usullari mavjud. Ushbu davolash usullarining barchasi O‘zbekiston shifokorlari foydalanadigan protokollarda aks etgan.

Ammo kimningdir hamroh kasalliklari bo‘lishi mumkin, kimdir shifoxonaga og‘irroq holatda kelib tushadi, kimdir kasallikni yengil shaklda boshdan o‘tkazadi. Ushbu jihatlar turli yo‘nalishga oid va turli tajribaga ega mutaxassislarning ishtirokida jiddiy tahlil o‘tkazishni talab qiladi. Shuning uchun, bu yerda biz shifokorlar bilmagan narsalarni aytib berdik deyishimiz xato, balki shunchaki o‘z tajribamiz bilan o‘rtoqlashdik, muammolarni birgalikda muhokama qildik va barcha muhim sohalarda munozaralar o‘tkazdik.

– Missiya yakunida sizga «O‘zbekiston Respublikasi sog‘liqni saqlash a’lochisi» ko‘krak nishoni va Respublika shoshilinch tibbiy yordam ilmiy markazining faxriy professori unvoni topshirildi...

– Menga mehnatni baholashning bunday munosabatidan juda ta’sirlandim. Buni butun guruhimizning ishi uchun minnatdorchilik deb qabul qildim.

Safarimiz iz qoldirmasdan qolmadi. Bu yerda bebaho tajriba orttirdik deb hisoblayman. Nafaqat bemorlarni davolash tajribasi, balki odamlar, boshqa mamlakat vakillari, hamkasblarimiz bilan muloqot qilish tajribasini ham orttirdik. O‘z sohamiz bo‘yicha ko‘plab do‘stlar orttirdik. Kelajakda tibbiyotni rivojlantirish yo‘lida hamkorlikni davom ettiramiz.

Bu yerda ekanligimizning  yana bir muvaffaqiyati to‘g‘risida aytmasam bo‘lmaydi. Albatta, biz ko‘p vaqtimizni ishda o‘tkazdik. Shunga qaramay, ushbu ajoyib zamin bilan tanishish, qadimiy  joylarni ko‘rish imkoniyatiga ham ega bo‘ldik. Ushbu taassurotlar va xotiralar uzoq vaqt saqlanib qoladi. Ko‘pchilik navbatdagi delegasiya tarkibida O‘zbekistonga qaytish istagini bildirgani bejiz emas.

Umid qilamanki, biz o‘zbekistonlik hamkasblarimiz bilan yana ko‘p yangi uchrashuvlar o‘tkazamiz, xotirjamroq davrda bu yerga sayyoh sifatida qaytib kelamiz. Hozirgi murakkab vaqtda esa hamkorlikni davom ettiramiz, hamkasblarimizga har doim yordam berishga tayyormiz.

Sog‘liqni saqlash vazirligi

Jamoatchilik bilan aloqalar bo‘limi.