Magistrlikka da’vogar 8 nafar talaba imtihondan chetlashtirildi
Magistratura ta’lim yo‘nalishi bo‘yicha mutaxassislik (ixtisoslik) fanlaridan kirish imtihonlari grafik asosida 13-17 avgust kunlari 2 smenada, ertalab soat 8.00 hamda kechki soat 16.00da o‘tkazilishi belgilangan.
Andijon davlat universitetining Pedagogika instituti binosida 6 ta magistratura mutaxassisliklari bo‘yicha kirish imtihonlarining adolatli va shaffof o‘tishini ta’minlash maqsadida imtihon jarayonlari o‘tkaziladigan hududlarga videokuzatuvi kameralari o‘rnatildi.
- Imtihon jarayonlari uzliksiz “imtixon.edu.uz” platformasi orqali onlayn namoyish etib borildi, - deydi Andijon davlat universiteti prorektori Rustamjon Mullajonov. – Bundan tashqari, imtihon topshiruvchilarning xavfsizligini ta’minlash maqsadida IIB va Milliy gvardiya xodimlari jalb etildi. Imtihon jarayonlarida karantin tartib-qoidalariga to‘la amal qilinadi.
Birinchi kuni imtihon topshirishi rejalashtirilgan 420 nafar talabgordan 373 nafari imtihonda qatnashdi, 97 nafari noma’lum sabablarga ko‘ra ishtirok etmadi. Shuningdek, 8 nafar abituriyent imtihon jarayonlari vaqtida ta’qiqlangan vositalar (telefon, shpargalka, turli aloqa vositalari)dan foydalangani uchun tegishli dalolatnoma tuzilib, imtihondan chetlashtirildi, 15 nafar abituriyent esa kech qolib kelganligi uchun imtihonlarga qo‘yilmadi.
