Germaniya gaz solig‘ini joriy qilishni rejalashtirmoqda

Germaniyada yangi gaz solig‘i uy xo‘jaliklariga yiliga 1000 yevrogacha tushishi mumkin. Bu haqda Germaniya iqtisodiyot vaziri Robert Xabek ma’lum qildi, deya xabar beradi Deutsche Welle.

«Isitish uchun gazdan foydalanadigan uy xo‘jaliklari oktyabr oyida yig‘im joriy etilgandan keyin hisoblarning bir necha yuz yevroga o‘sishini kutishlari kerak. Bu chora-tadbirlar kompaniyalarga kamayib borayotgan Rossiya gazining o‘rnini bosishiga imkon beradi», — dedi vazir.

Unga ko‘ra, departament soliqni bir kilovatt-soat uchun 1,5 sentdan 5 sentgacha bo‘lishini kutmoqda. «To‘rt kishilik oila uchun yillik 500 yevro (507 dollar) atrofida qo‘shimcha xarajat kutishingiz mumkin. Biroq yiliga o‘rtacha 20 ming kilovatt-soat gazni 5 sentdan iste’mol qiladiganlar uchun xarajatlar 1000 yevroga oshadi», — dedi Robert Xabek.

Iqtisodiyot vazirligi rahbarining aytishicha, soliq gaz bozorini barqarorlashtirishga qaratilgan. «Qashshoqlikka tushib qolish xavfi ostida bo‘lgan nemislar uchun qo‘llab-quvvatlash choralari ko‘riladi», - dedi vazir va bunday soliqning joriy etilishi «yoqimsiz, ammo zaruriy qadam» ekanligini ta’kidladi.

Germaniya vazirining bayonoti rossiyalik gaz eksportchisi «Gazprom» shirkati «Shimoliy oqim - 1» quvuri quvvatini 20 foizgacha qisqartirganidan keyin yangradi.

Germaniyadagi iste’molchilar bugungi kunda barcha sohalarda o‘sib borayotgan inflyasiya tufayli jiddiy moliyaviy bosim ostida. To‘lovni joriy etishning asosiy sababi Rossiyadan gaz yetkazib berishning qisqarishi va keyinchalik import qilinadigan gaz narxining keskin oshishi hisoblanadi.

Soliqning maqsadi - barcha gaz iste’molchilari o‘rtasida Rossiya gazini almashtirish uchun to‘lash xarajatlarini taqsimlash.

1 oktyabrdan kuchga kiradigan yig‘im import qiluvchilarga o‘z xarajatlarining 90 foizini o‘z zimmasiga olish imkonini beradi, deya xabar beradi Iqtisodiyot vazirligi.

«Narxlarni sof tartibga solish mexanizmi» deb ataluvchi mexanizm 2024 yil sentyabr oyi oxirigacha amal qiladi.