Xalqaro tadbir doirasida IHT Shahrisabz deklarasiyasi qabul qilindi
26-aprel kuni “Shahrisabz – Iqtisodiy hamkorlik tashkiloti turizm poytaxti” xalqaro tadbiri doirasida “Iqtisodiy hamkorlik tashkiloti hududida chegarasiz turizm” mavzusida sayyohlik forumi bo‘lib o‘tdi.
Tadbirda IHTga a’zo davlatlar, jumladan, Pokiston, Eron, Turkiya, Ozarbayjon, Qozog‘iston, Qirg‘iziston, Tojikiston delegasiyalari rahbarlari va yuqori martabali mehmonlar ishtirok etdilar.
"IHT doirasida turizmni rivojlantirishda birgalikda ishlashimiz uchun ko‘plab imkoniyatlar mavjud. Turizm bizni yo‘naltiruvchi maqsad, umumiy maqsadlar sari harakatlantiruvchi manba bo‘lishi mumkin. Biz birgalikdagi sa’y-harakatlarimizni umum transchegaraviy tabiiy va madaniy merosimizni himoya qilish va targ‘ib etish, IHT bo‘ylab o‘zaro manfaatlarni birlashtirish yo‘lida diplomatik aloqalarni kuchaytirish va turizm infratuzilmalariga sarmoyalarni ko‘paytirish hamda bor imkoniyatlarni ishga solish va bir-birimiz bilan ilg‘or tajribalarni almashishda faollikni taklif qilamiz»- deb ta’kidladi Turizm qo‘mitasi raisi Umid Shadiyev.
Forum ishtirokchilari barqaror va inklyuziv turizmni rivojlantirish uchun qulay sharoitlar yaratishga qaratilgan qo‘shma sa’y-harakatlarni qo‘llab-quvvatlashlarini e’lon qildilar.
Shuningdek, ekologik makonda ichki turizmni rag‘batlantirish va o‘zaro turistik oqimlarni oshirish uchun a’zo davlatlarning turizm salohiyatini oshirish bo‘yicha o‘z fikrlarini bildirdilar.
"Men IHTga a’zo davlatlar o‘rtasida turizmning iqtisodiy rivojlanish va mintaqaviy integrasiya uchun to‘liq salohiyatini ochish uchun doimiy hamkorlikka chaqiraman. Imkoniyatlarni aniqlash va muammolarni hal qilishda birgalikda harakat qilaylik, xalqlarimiz va fuqarolarimiz porloq kelajakka hissa qo‘shaylik. Birgalikda kuchli tomonlarimizni ishga solish orqali biz global turizm sohasidagi mavqeimizni oshirishimiz va madaniy almashinuvni rivojlantirishimiz mumkin", - dedi IHT Bosh kotibi Husrav Noziri.
Forum yakunida IHTga a’zo davlatlar kelishuvi bilan O‘zbekiston hamda IHT tashabbuslari asosida Shahrisabz deklarasiyasi qabul qilindi.
